Türkiyənin Qəhrəmanmaraş bölgəsində 2-ci Beynəlxalq Kitab sərgisi keçirilib.

Axar.az xəbər verir ki, millət vəkili Qənirə Paşayeva sərgidə çıxış edib. O, Qarabağın hamı üçün doğma olduğunu qeyd edib:

"Biz inanırıq ki, Ermənistanın işğal etdiyi gözəl Dağlıq Qarabağımız da, işğal altındakı digər o gözəl bölgələrimizin də işğaldan azad olduğu gün çox tezliklə gələcək və biz oranı ziyarət edəcəyik".

Millət vəkili deyib ki, hər bir türk insanı Qarabağı hər gün yad etməlidir:

"Çox təəssüf ki, işğalçılar tariximizi silmək üçün orada yerləşən mədəniyyət və tarixi abidələrimizi məhv edirlər. Dünya buna göz yumur. Ermənistanın işğal etdiyi Azərbaycan torpaqlarında törətdiyi vandalizm aktlarına, soyqırımlara bütün dünyanın gözü bağlıdır. Amma bu belə davam etməyəcək".

O bildirib ki, harada doğulmasından asılı olmayaraq, hər bir türk insanı Xocalı soyqırımını törədənlərin öz layiqli cəzasını alması üçün çalışmalıdır.

Millət vəkili yazar-araşdırmaçı İmdad Avşarla birlikdə hazırladığı "Qarabağ hekayələri" kitabını tədbir iştirakçılarına hədiyyə edib. Tədbirin sonunda bölgənin bələdiyyə rəsmiləri millət vəkilinə dəvəti qəbul etdiyi və konfrans üçün təşəkkürünü bildiriblər.