Tanınmış azərbaycanlı iş adamı Adnan Əhmədzadənin həbsindən sonra onun Birləşmiş Ərəb Əmirliklərində yerləşən şirkətinin bütün səhmləri şirkətin baş direktoru Yusif Məmmədov tərəfindən alınıb.

Axar.az Haqqin.az-a istinadla xəbər verir ki, bu barədə Sinqapur nəşri şirkətin rəsmi press-relizinə istinadən məlumat yayıb.

Dubayda yerləşən və son benefisiarı Adnan Əhmədzadə olan “Oilmar Shipping and Chartering DMCC” dəniz yanacağı və neft məhsullarının satışı üzrə ixtisaslaşıb. Şirkət 2015-ci ilin noyabrında yaradılıb və dünyanın 60-dan çox ölkəsində xidmət göstərir. 2022-ci ildə Oilmar komandası ilk dəfə olaraq 1 milyard ABŞ dollarını keçən ümumi gəlir əldə etdi.

Sinqapurun bunker nəşri olan “Manifold Tayms” yazır ki, “Oilmar”ın sahibi ilə bağlı “hadisələr” (azərbaycanlı oliqarxın həbsi nəzərdə tutulur – red.) səhmlərin geri alınması prosesini işə salır.

Sentyabrın 24-də sosial mediada yayımlanan bəyanatda şirkət səhm alışının onun son benefisiar sahibi ilə bağlı hadisələr və mediada dərc olunan xəbərlərlə bağlı olduğunu bildirib.

“Bu hallara cavab olaraq və səhmdarlarımızın maraqlarını qorumaq üçün şirkət rəhbərliyi artıq “Oilmar Shipping and Chartering DMCC”-nin bütün səhmlərinin alınması prosesinə başlayıb”, - şirkətin baş direktoru Yusif Məmmədov vurğulayıb.

Y.Məmmədovun sözlərinə görə, satınalma prosesi yaxşı gedir və yaxın bir neçə gün ərzində tamamlanacağı gözlənilir: “Bu strateji addım bizim əməliyyat davamlılığımızı təmin etmək və işimizi istintaq zamanı mümkün pozulmalardan qorumaq məqsədi daşıyır”.

Y.Məmmədov şirkətin səhmdarlarını əmin edib ki, bu məsələ onun gündəlik fəaliyyətinə və ya yüksək keyfiyyətli xidmət göstərmək qabiliyyətinə təsir etməyəcək:

“Biz eyni dürüstlük və peşəkarlıq standartlarını qoruyaraq, həmişəki kimi fəaliyyətimizi davam etdirəcəyik. Şirkət yalnız təsdiqlənmiş və təsdiqlənmiş məlumatlar əsasında yeniləmələr təqdim edəcək və biz əminik ki, bu məsələ tezliklə həll olunacaq”.