Demokratik İslahatlar Partiyası (DİP) Mətbuat günü münasibəti ilə "Həsən bəy Zərdabi və Nəcəf Nəcəfov ənənələrinin davamı və inkişafı uğrunda" mükafata layiq görülən jurnalistlərin adlarını açıqlayıb.

Partiyanın mətbuat xidmətindən Axar.az-a verilən məlumata görə, mükafat 3 nominasiya üzrə müəyyən olunub:

1. Nailə Bağırova – (Ann.az saytı) təhsil və mədəniyyətin təbliğinə dair materialların hazırlanmasındakı roluna görə

2. Aygün Yusibova (Axar.az saytı) – Qarabağ probleminə və ölkənin ictimai-siyasi gündəminə dair hazırladığı obyektiv materiallara görə

3. Sənan Rzayev (CBC telekanalı) – xarici dildə peşəkar xəbər buraxılışlarının və teleproqramların hazırlanmasındakı xidmətlərinə görə.

Qeyd edək ki, mükafatın təsis edilməsində əsas məqsəd əsası 1875-ci ildə Həsən bəy Zərdabi tərəfindən qoyulmuş, 20-ci əsrin 90-cı illərində Nəcəf Nəcəfov tərəfindən yenidən canlandırılmış Azərbaycan mətbuatının maarifçilik ənənələrini davam etdirmək, azad, demokratik və peşəkar mətbuatın formalaşması uğrunda yorulmadan mübarizə aparan, obyektiv və məsuliyyətli sözə üstünlük verməyə həvəsləndirməkdir. Mükafat DİP tərəfindən 2008-ci ildə təsis olunub.

DİP sədri Asim Mollazadə sözügedən mükafata layiq görülən jurnalistləri və Azərbaycan KİV-nin bütün nümayəndələrini 22 iyul – Milli Mətbuat Günü münasibətilə təbrik edib.

Qeyd: Axar.az kollektivinin ən gənc üzvlərindən olan Aygün Yusibova və digər həmkarlarımızı təbrik edirik.