Rusiya-Türkiyə münasibətlərinin istiləşməsinə mane olacaq faktorların olmasına rəğmən, tərəflər qarşılıqlı addımlar atmaqdadırlar.

Bu sözlər analitik Vüqar Zifəroğlunun Axar.az-a verdiyi açıqlamada yer alır. O, Rusiya ilə Türkiyə arasında Suriya ətrafında ciddi fikir ayrılığının mövcud olduğunu deyib: "Düşünmürəm ki, tərəflər Suriya ilə bağlı hər hansı güzəştə getsin. Sadəcə, Rusiya və Türkiyənin Suriyaya dair məsləhətləşmələrə başlaması normal olardı".

Analitik qeyd edib ki, Ərdoğanın Rusiya səfərində önə çəkilən əsas məsələlər iqtisadi platformada olacaq:

"İki ölkə arasında 35 milyard dollarlıq mübadilə var idi və onun bərpası, hətta daha da genişləndirilməsi gündəmdə olacaq. Turizm və tikinti sektorundan tutmuş qida embarqolarına qədər, bir çox məqam müzakirə masasına yatırılacaq".

V.Zifəroğlunun fikrincə, daha çox siyasi çalarlara malik olan "Türk axını" layihəsinin yenidən aktuallaşması bir sıra ölkələr arasında qaz ixracı rəqabətini gücləndirəcək:

"Türkiyə Asiyadan Avropaya gedən qaz yolunun təbii tranzitidir. İsrailin şelfində yeni qaz yataqları tapılıb. Bu kontekstdə Türkiyə ilə İsrail arasında yenicə reallaşan Roma anlaşması diqqət çəkir. Digər tərəfdən, Misir və Rusiya da qaz ixracatçılarıdır. Bazara girməyə hazırlaşan və uzun müddətdir ki, gözləyən başqa bir tərəf isə İrandır. Odur ki, sözügedən dövlətlərlə Türkiyənin tranzit maraqları bir araya gəlir. Hazırda ən əsas məsələ qazın ixracı ilə bağlı ortaya çıxan yeni maraqların toqquşmamasıdır".

Qeyd edək ki, Rəcəb Tayyib Ərdoğan və Vladimir Putin Sankt-Peterburqda avqustun 9-da bir araya gələcəklər. Su-24 olayından sonra Rusiyaya səfər edən ilk yüksək rütbəli hökumət nümayəndəsi olan Türkiyə baş nazirinin köməkçisi Məhməd Şimşək hazırda Rusiyada səfərdədir.