Avqustun 9-da Sankt-Peterburqda Türkiyə Prezidenti Rəcəb Tayyib Ərdoğanın rusiyalı həmkarı Vladimir Putinlə keçiriləcək görüşü Ankaranın Moskvaya meyil etməsinin başlanğıcı olacaq.

Axar.az xəbər verir ki, bu iddia ilə Foreyn Polisi çıxış edib.

Nəşrin sözlərinə görə, tərəfləri birləşdirəcək xüsusi bir səbəb yoxdur. Sadəcə, Suriya Prezidenti Bəşər Əsədin mövqeyinin bərpası artıq hər iki tərəfin maraqlarına cavab verir:

"Rusiyanın və İranın Suriyada apardığı əməliyyatlar göstərir ki, Bəşər Əsəd hələ uzun müddət öz hakimiyyətini qoruyub saxlayacaq. Türkiyə prezidenti bu inkarolunmaz faktı görməzdən gələ bilməz.

Ərdoğanın bu əməkdaşlıqda Əsəddən başqa maraqları da var. O, Kürd İşçi Partiyasını (PKK) və Xalqların Demokrat Partiyasını (HDP) darmadağın etmək istəyir. Bunun üçün onun müttəfiqlərin dəstəyinə – Rusiya və İrana ehtiyacı var.

ABŞ Türkiyəyə istədiyi köməyi göstərmədikcə, Türkiyə Rusiyaya can atmağa davam edəcək".