Azərbaycan Respublikasının Prezidenti İlham Əliyev yanvarın 27-də Sumqayıt Sənaye Parkında bir sıra istehsal müəssisələrinin açılışında və təməlqoyma mərasimlərində iştirak edib. Sənaye parkları Azərbaycanda iqtisadi inkişafın yeni drayverlərindən birinə çevrilməkdədir. Bir tərəfdən yerli tələbin ödənilməsinə töhfə verən sənaye parkları digər tərəfdən qeyri-neft ixracatının artımına dəstək olurlar.

Axar.az xəbər verir ki, bu barədə iqtisadçı alim, millət vəkili Vüqar Bayramov qeyd edib.

Deputatın sözlərinə görə, 2025-ci ilin ilk 11 ayında qeyri-neft-qaz məhsullarının ixracı 3 milyard 317 milyon dollar olub:

“Bu o deməkdir ki, faktiki qiymətlərlə Azərbaycanın qeyri-neft-qaz ixracatı 7,3 faiz artıb. Bu artımda isə sənaye parklarının və eləcə də sahibkarlığa dövlət dəstəyinin gücləndirilməsinin xüsusi payı vardır. Sənaye zonalarında indiyədək ümumilikdə 19,4 milyard manatlıq məhsul istehsal edilib ki, bunun 6,1 milyard manatlıq hissəsi ixrac olunub. Hazırda istehsal olunan məhsullar dünyanın 70 ölkəsinə ixrac edilir.

Neft bazarındakı volatillik, qlobal geosiyasi risklərin gücləndiyini nəzərə aldıqda qeyri-neft-qaz ixracatınınn daha da artırılması iqtisadi şaxələnmə üçün xüsusi əhəmiyyət kəsb edir. 2026-cı ildə büdcə gəlirlərinin 57 faizi, ümumi daxili məhsulun isə 68 faizi qeyri-neft-qaz sektorunun payına düşəcək. Bu konteksdən ümumi ixracatda da qeyri-neft-qaz sektorunun payının daha da artırılması yeni dövrün əsas hədəflərindəndir”.