Rusiya və Azərbaycan münasibətlərindəki böhranı aradan qaldırıblar; indi onlar ikitərəfli əməkdaşlığı inkişaf etdirməlidirlər.

Axar.az xəbər verir ki, bunu Rusiya Təhlükəsizlik Şurasının katibi Sergey Şoyqu deyib.

“Məmnuniyyətlə qeyd edirik ki, ikitərəfli münasibətlərdəki son böhran dövrü Moskva və Bakının birgə səyləri nəticəsində aradan qaldırılıb. İndi qarşıda duran ortaq vəzifə, liderlər səviyyəsində əldə olunmuş razılaşmalara uyğun olaraq, Rusiya-Azərbaycan əməkdaşlığının davamlı inkişafını təmin etməkdən ibarətdir”, - Şoyqu bildirib.

Onun sözlərinə görə, Rusiya tərəfi Azərbaycanla münasibətlərin ikitərəfli hüquqi baza — o cümlədən ən yüksək səviyyədə imzalanmış Müttəfiqlik Qarşılıqlı Fəaliyyəti haqqında Bəyannamə və həmçinin mehriban qonşuluq və tərəfdaşlıq prinsipləri əsasında inkişaf etdirilməsi zərurətindən çıxış edir:

“Rusiya Prezidenti Vladimir Putin dəfələrlə bu istiqamətdə birgə fəaliyyətin həyata keçirilməsinin tərəfdarı kimi çıxış edib”.