Qənirə Paşayeva İraq türkmanlarının ağır vəziyyətini Milli Məclisdə qaldırıb.

Axar.az xəbər verir ki, Milli Məclisin bu gün keçirilən plenar iclasında çıxış edən millət vəkili İraq türkmanlarının daha da gərginləşən vəziyyətindən danışıb və onlara dəstək üçün çağırış edib:

"İraqda yaşayan soydaşlarımıza əlimizdən gələn dəstəyi göstərməliyik. Onlar çox ağır vəziyyətdədir. İraq Türkman Cəbhəsinin rəhbəri Ərşad Salihi ilə telefonla danışdıq. O, Təlafərdə, Kərkükdə, Mosulda və digər bölgələrdə insanlarımızın ağır vəziyyətdə olması, son dönəmlərdə isə İŞİD-in təhdidi barədə danışdı. Ərşad Salihi vəziyyətin çox ağır olduğunu və qardaş Azərbaycandan dəstək gözlədiklərini bildirdi. Azərbaycan hər zaman İraqda yaşayan soydaşlarımıza əlindən gələn dəstəyi göstərib və inanıram ki, çağırışlarına səs verib bütün platformalarda, bütün imkanlar daxilində onlara dəstək verəcəyik".