"Əvvəla, o xəbəri redaktor yazmayıb, xəbərin müəllifi var. Kütləvi İnformasiya Vasitələri haqqında qanunun 44-cü maddəsinə görə, redaktoru məhkəməyə verə bilməzlər. Hər şeydən öncə iddia ərizəsində bu məsələdə qanun pozulub və müdafiə tərəfi bundan istifadə edə bilər".

Bu sözləri hüquqşünas Müzəffər Baxışov müğənni Mətanət İsgəndərlinin böhtana görə "Aznews.az" xəbər portalının Baş redaktoru Elçin Zahiroğlunun və portalın əməkdaşı İntiqam Alıyevin həbs olunması iddiası ilə bağlı məhkəmə davasına münasibət bildirərkən söyləyib. M.Baxışlı 147.1-ci maddə ilə həbs praktikasının artıq uzun illərdir ki, aradan qaldırıldığını da qeyd edib:

"Digər məsələ diffomasiya ilə bağlı qanunun illərdir müzakirə olunduğu bir məqamda belə bir iddianın ortaya atılmasıdır. Bilirsiz ki, Avropa Şurası dəfələrlə yanlış məlumat yaydığına görə jurnalist həbsinin aparılmaması ilə bağlı tövsiyyələrini verib və bu məsələ Bakıda bir neçə dəfə müzakirə olunub. Azərbaycanın qoşulduğu konvensiyalar da bu maddə ilə həbsi mümkünsüz edir. Yəqin xatirinizdədir ki, müzakirələr zamanı artıq bu maddə ilə illərdir həbs aparılmadığı barədə hökumət nümayəndələri də rəsmi fikir bildirdilər və maddənin aradan qaldırılmamasının səbəbi kimi milli mentaliteti göstərdilər. Bu baxımdan, böhtana görə məhkəmə iddiası qaldıran Mətanət xanımın şikayəti əsasında saytın baş redaktorunun və ya jurnalistin həbsi mümkün deyil. Amma hansısa formada cəzanı istisna etmirəm. Məsələn, Azərbaycan Respublikası Cinayət Məcəlləsinə əsasən, yalan olduğunu bilə-bilə hər hansı şəxsin şərəf və ləyaqətini ləkələyən məlumatı yayan şəxsə 147.1-ci maddə (bu, maddənin ən yüngül bəndidir) ilə dava açılıbsa və xəbəri yazan jurnalist yazdığını sübut edə bilməsə, onda ən sərt cəza kimi məhkəmənin 500 AZN-ə qədər cərimə tətbiqi və təkzib qərarı çıxarılacağı mümkündür".

Hüquqşünas həm də onu bildirdi ki, üzdə olan bir sənət adamının iki jurnalisti həbs etdirmə istəyi də normal deyil: "Əlbəttə, sənət adamları adətən belə məsələləri Mətbuat Şurası vasitəsilə həll edirlər. Elə müdafiə tərəfi də birinci növbədə Mətbuat Şurasına müraciət edilməməsindən istifadə edəcək. Yəni məhkəmə nəzərə alacaq ki, təkzib və geniş açıqlama üçün sayta müraciət olunmayıb, məsələ birbaşa məhkəməyə çıxarılıb. Doğrudur, bu, hər bir Azərbaycan vətəndaşının haqqıdır. Amma medi ilə münasibətlərinin tənzimlənməsində maraqlı olan sənət adamı daha başqa yollardan istifadə edir".

Xatırladaq ki, "Aznews.az" saytı Mətanət İsgəndərlinin narkoman olduğuna dair xəbər vermişdi. Bunun qarşılığında müğənni Nərimanov Məhkəməsinə xüsusi ittiham qaydasında müraciət edərək, xəbərin yazan jurnalistin və Baş redaktorun böhtana görə (Cinayət Məcəlləsi. maddə 147.1) cinayət məsuliyyətinə cəlb olunmasını tələb edib.