"Hazırda Azərbaycanın müharibəyə qədərki vəziyyəti və
müharibənin baş vermə ehtimalı xalqımıza travmatik stress
yaşatmayacaq".
Bunu Axar.az-a açıqlamasında Psixologiya və Konsultasiya
Mərkəzinin psixoloqu Elnur Rüstəmov müharibə baş verərsə, bunun
ardarda faciələr yaşamış Azərbaycan xalqının psixoloji durumuna
təsiri məsələsini şərh edərkən deyib.
Onun sözlərinə görə, əvvəllər müharibə yalnız günahsız
insanların ölümü ilə xarakterizə olunurdu. Lakin müharibənin
üstünlükləri də var:
"Əgər söhbət Azərbaycanın işğal olunmuş ərazilərinin
qaytarılmasından gedirsə, bu yoldakı irəliləyiş insanlar arasında
həmrəylik yaradacaq. Bu, eyni zamanda insanlar arasında bağlılığı
daha da artıracaq, stress hallarını isə azaldacaq. İnsanlar
bir-birlərinin dərdinə həmrəy olacaqlar. Belə olan hallarda isə
düşmən vahid düşmənə çevrilir və nəticədə obyektivlik yaranır. Son
zamanlar baş verənlər Azərbaycan xalqının nə qədər həmrəy olduğunu
və müxtəlif baxış bucaqlarının necə bir nöqtədə birləşdiyini ortaya
qoydu. Çünki düşmənimiz bəllidir. Buna görə də mən belə düşünürəm
ki, müharibə olarsa, birincisi, Azərbaycanın ordusu var müharibə
üçün. Başqa bir tərəfdən isə torpaqlarımızın iyirmi faizinin işğal
altında olması zaman-zaman insanların psixologiyasına mənfi təsir
göstərməsi və güvən sarsıntısı yaşatması müşahidə olunurdu. Əgər
yenidən biz müharibə ilə üz-üzə qalarıqsa, bu, insanlarımızın
psixoloji durumuna mənfi təsir etməyəcək. Çünki xalqımız çox gözəl
bilir ki şəhidləri vətən uğrunda verir".
E.Rüstəmovun fikrincə, bir ölkə düşmən tapdağında olan vətəni
üçün şəhid verirsə, bu, birbaşa həmin ölkənin genefonduna müsbət
təsir göstərir. Mənfi tərəfi əks etdirən müharibə rejiminin müsbət
tərəflərindən biri də həmin ölkəyə qəhrəmanlar qazandırmasıdır:
"Son günlər baş verənlər hadisələrlə bağlı öz əzmini ortaya
qoyan Azərbaycan dövləti öz genefondunu formalaşdırmış oldu.
Müharibə baş verərsə, insanlarımız travmatik stress yaşamayacaq.
Bunu yalnız döyüş əsnasında savaşan əsgərlər yaşaya bilərlər. Bu da
posttravmatik stresdir ki, döyüşdən sonra bununla bağlı tədbirlər
görülməlidir, yəni onlar reabilitasiya olunmalıdırlar. Bu hal
ikinci dünya müharibəsindən sonra elmə daxil olub".
Psixoloq onu da qeyd etdi ki, əgər torpaqlarımızın alınması
hərbi yolla həll olunarsa, bu xalqın psixoloji durumunu
sarsıtmayacaq, əksinə illərdir güvən sarsıntısı yaşayan xalqımıza
yeni ümid bəxş edəcək.