Gürcüstan Prezidenti Georgi Marqvelaşvili keçirdiyi brfinqdə Birləşmiş Millətlər Təkilatının iclasına qatılmaq üçün ABŞ-a səfərinin son anda təxirə salınmasına aydınlıq gətirib.

Axar.az-ın Szona.org saytına istinadən verdiyi xəbərə görə, o, səfərinin təxirə salınmasını prezident institutuna zərbə sayıb.

Qeyd edək ki, BMT-nin iclasında prezidentin, yaxud Baş nazir İrakli Qaribaşvilinin qatılacağı məsələsi son günlər Gürcüstan siyasi mühitinin və media xəbərlərinin əsasını təşkil etməkdəydi. Səfərlə bağlı məsələ o qədər mürəkkəbləşdi ki, hətta BMT-yə iki nümayəndə heyətinin göndərilməsi gündəmə gəldi. Siyasi analitiklər kiçik bir ölkədən eyni vaxtda prezident və baş nazirin komandalarının mümkün səfərlərini gülüşlə qarşıladılar. Vəziyyətin gərginləşdiyini görən sabiq baş nazir Bidzina İvanişvili hazırkı prezident Georgi Marqvelaşvilini sərt tənqid edərək, onu hökumətin işinə mane olmaqda və bu qurumu özünə rəqib görməkdə qınadı.

Beləliklə, bu cür ictimai qınaqlardan sonra Prezident Marqvelaşvili brifinq keçirmək məcburiyyətində qalıb və jurnalistlərlə görüşündə bildirib ki, əslində o, ona məxsus səlahiyyətlər çərçivəsində davranıb. Hər hansı digər məqsədi olmayıb. Marqvelaşvili qeyd edib ki, Xarici İşlər naziri ilə görüşüb və BMT-yə səfərinin detallarını öyrənib. Lakin səfərinin təxirə salınmasını dünən səhər saatlarında bilib. O, səfərin kimlər tərəfindən təxirə salındığını araşdıracağına söz verib və diqqətə çatdırıb ki, bu addım Gürcüstanda prezident instituna vurulan ən böyük zərbədir.

Marqvelaşvili xatırladıb ki, bir dövlət başçısı kimi ölkədə bütün dövlət qurumların paralel inkişafında maraqlıdır.

Xatırladaq ki, dünən Bakıya səfərə gələn Gürcüstan Baş naziri İraklı Qaribaşvili Şəhidlər Xiyabanında gürcü jurnalistlərinə açıqlamasında onun rəqibinin Prezident Marqvelaşvili deyil, yoxsulluqla mübarizə və iqtisadiyyatın dirçəldiləməsi olduğunu bildirib.