Avqustun 12-də Qazaxıstanın Aktau şəhərində Xəzəryanı ölkələrin dövlət başçılarının V Zirvə toplantısında Xəzər dənizinin hüquqi statusuna dair Konvensiyanın imzalanması tarixi əhəmiyyətə malikdir.

Bu sözləri Axar.az-a açıqlamasında millət vəkili Sevinc Fətəliyeva deyib. Millət vəkili vurğulayıb ki, Konvensiyanın imzalanması Xəzəryanı ölkələr arasında yüksək səviyyədə əməkdaşlıq, eyni zamanda, təhlükəsizlik, sabitliyin qorunmasına müsbət mənada öz təsirini göstərərək, iqtisadi sahədə də geniş imkanlar yaradacaq və inkişafa öz töhfəsini verəcək:

“Konvensiya Xəzəryanı ölkələrin əməkdaşlığını yeni müstəviyə çıxararaq, dövlətlərə və xalqlara fayda gətirəcək. Əldə olunmuş razılıq Transxəzər borularının tikilməsi üçün lazımı şərait yaradır ki, bu da Azərbaycanın nəqliyyat imkanlarını xeyli genişləndirir, ölkənin tranzit potensialını artırır, geosiyasi çəkisinin yüksəlməsi üçün əlverişli mühit yaradır”.

Millət vəkili bildirib ki, Xəzərin hüquqi statusunu müəyyən edən yekun Konvensiyanın tarixi əhəmiyyətinin ən əsas göstəricisi isə regionda və bütövlükdə qlobal aləmdə sülhə və təhlükəsizliyə xidmət göstərməsidir:

“Məhz bu mənada Xəzərin bundan sonra da regionda sabitləşdirici rol oynaması üçün razılaşdırılmış Konvensiyanın əhəmiyyəti müqayisəedilməz dərəcədə böyükdür”.