"Əhliman Abbasın Müsavata gəlməsində mənim rolum olsa
da, onun partiyadan getməsini heç vaxt arzulamamışam".
Axar.az xəbər verir ki, bu açıqlama ilə iqtisadçı ekspert Qubad
İbadoğlu öz Feysbuk səhifəsində çıxış edib. O, Əhliman Abbasın belə
qərar verməsinin üzərinə götürdüyü öhdəlikləri yerinə yetirə
bilməyəcəyi ilə bağlı narahatlıqdan irəli gəldiyini bildirib:
"2011-ci ildə Əhliman bəy öz arzusu ilə Müsavat Partiyasını
seçdi, onu mənim təqdimatımla Divanda qəbul elədik. Qəbulla bağlı
təqdimatdan bəlli oldu ki, onu partiyaya gətirən müsavatçılıq
ideologiyası və Azərbaycan amalıdır. O, Azərbaycan Dövlət İqtisad
Universitetində xüsusi istedadlar qrupunda bakalavr, Böyük
Britaniyanın Nyukasl Universitetində beynəlxalq iqtisadiyyat üzrə
magistr dərəcəsi alıb. Belə gəncləri müxalif mövqedə olan siyası
partiyalarda barmaqla saymaq olar. O, xaricdə təhsil alıb vətənə
qayıdanda digər seçimlərə malik olsa da, karyera və mənafe ardınca
getmədi, başqalarından fərqli olaraq yenə də Müsavata gələrək,
yoluna davam elədi. Debütü də pis olmadı, ilk dəfə qoşulduğu
seçkilərdə gənclərin böyük əksəriyyətinin səsini qazandı və üzərinə
böyük məsuliyyət götürdü. Düşünürəm ki, bəlkə də o bu məsuliyyəti
üzərinə götürməsəydi, hazırda belə qərar verməzdi. Çünki onun məlum
qərarı üzərindəki məsuliyyətdən, yalnız özünün yox, daha çox
ətrafında olan gənclərin qarşısında götürdüyü öhdəlikləri indiki
şərtlər daxilində yerinə yetirə bilməyəcəyi narahatçılığından irəli
gəlir. Onlar yeni dönəmdə partiyanın idarəçiliyində təmsil olunmaq
və potensiallarını daha yaxşı reallaşdırmaq əzmində idilər. Məhz
ona görə də gənclərin son qurultaydan gözləntiləri çox idi".
Qubad İbadoğlu onun bundan sonra da mübarizəsini davam
etdirəcəyinə inandığını deyib:
"Əhliman bəy müstəqil düşüncəli, analitik təfəkkürlü və siyasi
təhlil qabliyyətinə malik, siyasətdə ideyalarını reallaşdırmaq
istəyən və bu prosesə daimi yenilik gətirmək niyyətində olan
potensiallı gənclərimizdəndir. Çox təəssüf ki, onu və onun kimi
digər müasir dünyagörüşlü və azadfikirli gəncləri partiyada saxlaya
bilmirik. Mən onun partiyadan getməsinə nəinki təəssülənirəm, həm
də partiyanın gələcəyinə acıyıram. Onun Müsavatı seçməsi məni nə
qədər sevindirmişdirsə, partiyadan getməsi də bir o qədər məyus
etdi. Əslində bunu, xaricdə təhsil alıb vətənə qayıdaraq siyasətə
baş vuran bir azərbaycanlı gəncin ugursuzluğu kimi deyil, ölkəmizin
gələcəyinə verilə biləcək əhəmiyyətli töhfənin itkisi kimi
qiymətləndirirəm. İnanıram ki, Əhlman Abbas bundan sonrakı
fəaliyyətində də vətən sevgisi ilə başladığı mübarizəsini
Azərbaycan demokratikləşənə qədər davam etdirəcək".