Bütün Qafqazın Şeyxi Allahşükür Paşazadə oktyabrın 13-də Azərbaycanda səfərdə olan İran Televziya və Radio Şirkətinin başçısı İzzətullah Zərqamini qəbul edib.

Axar.az xəbər verir ki, görüşdə İran-Azərbaycan münasibətlərində bəzən gərginliklər yaşansa da, son zamanlar iki dövlət arasında münasibətlərin sabit inkişaf etdiyi vurğulanıb. A.Paşazadə İ.Zərqaminin səfərilə bu münasibətlərin daha da yaxşılaşacağına ümidvar olduğunu söyləyib.

QMİ sədri İranın "Səhər" roqramını Azərbaycana qarşı mənfi mövqe sərgilədiyinə görə tənqid edib. Bu telekanalın yayımının Azərbaycanda güclü narazılıq yaratdığını deyib və adının dəyişdirilməsinin lazım gəldiyini vurğulayıb. İranla Azərbaycanın müştərək telekanal quracağı halda bu telekanalda dini biliklərin təbliğinə yer verilməsini istəyib.

Bəzi ekspertlərin qənaətinə görə, bu görüş İranın bəzi kanallarında Azərbaycan əleyhinə təbliğat aparılmasının qarşısını ala bilər. Hətta iki ölkə arasında ortaq dini-mədəni əlaqələrin təbliği üçün proqramların açılması mümkündür. Ehtimallar sırasında "Səhər" proqramının bağlanması və yaxud siyasi kursunun dəyişməsi haqda gözləntilər də yer alır.

Qeyd edək ki, "Səhər" proqramında Azərbaycanla bağlı bir çox hallarda düşmən münasibət sərgiləyən süjetlər hazırlanır.