Nəqliyyat Nazirliyinin mətbuat xidməti demək olar ki, üç aydır fəaliyyətsizdir. Jurnalistlərin hər zaman suallarını cavablandıran, efirdə tez-tez çıxış edən nazirlik sözçüsü Namiq Həsənov əvvəlki qədər fəal deyil, zənglərə cavab vermir.

Axar.az bu müəmmanın səbəbini araşdırarkən nazirlikdən bildirildi ki, həmkarımız Namiq Həsənovun səhhətində yaranmış problemlər onun uzun müddətdir işindən kənarda qalmasına səbəb olub.

Nazirliyin mətbuat xidmətindən deyildi ki, N.Həsənov avqust ayından etibarən bu günə kimi müalicə olunur:

"Namiq müəllim şəkər xəstəsidir. Bu səbəbdən müalicəsi hələ də davam edir. Nə vaxtdan etibarən işə çıxacağı məlum deyil. Şəkər olduğu üçün işə çıxması ləngiyib. Yaydan etibarən işə gəlmir. Ancaq mobil telefon vasitəsilə jurnalistlərin suallarını cavablandırmağa çalışır".

Qeyd etmək lazımdır ki, dövlət qurumlarının mətbuat xidmətləri arasında hər zaman Nəqliyyat Nazirliyi fəallığı ilə seçilib. Lakin son aylarda müşahidə olunan bu passivlik azmış kimi, N.Həsənovu əvəz edəcək bir əməkdaş belə yoxdur ki, suallarımızı ətraflı cavablandırsın. Sanki nazirliyin media sahəsi bir şəxsdən asılı qalıb. N.Həsənovun isə yoxluğu bu istiqamətdə nəinki boşluq yaradıb, ümumiyyətlə mətbuat xidməti iflic olub.

Axar.az olaraq həmkarımıza şəfa diləyirik və tez bir zamanda işini bərpa etməsini arzulayırıq. Nazirliyə gəlincə, katib gələnə qədər mətbuatın suallarını cavablandıracaq bir xidmət əməkdaşı ayrılarsa, yaxşı olar.