Binəqədi Rayon İcra Hakimiyyətinin başçısı Xaləddin İsgəndərovun qalmaqallı birinci müavini Qəzənfər Novruzovun yerinə yeni təyinat rəsmiləşib.

Binəqədi Rayon İcra Hakimiyyətindən "Axar.az"a verilən məlumata görə, başçısının 4 dekabr 2013-cü il tarixli əmri ilə başçının müavini İlqar Süleymanov birinci müavin, Yeni Azərbaycan Partiyası Binəqədi rayon təşkilatının baş təlimatçısı 25 yaşlı Aygün Əliyeva isə müavin təyin edilib.

Xatırladaq ki, Xaləddin İsgəndərovun bir müddət əvvəl vəzifədən azad etdiyi Qəzənfər Novruzovun yerinə birinci müavin səlahiyyətlərini rayon icra hakiminin digər müavini Vüsar İsmayılov yerinə yetirirdi. Birinci müavinin səlahiyyətlərini icra etdiyi üçün məhz onun təyinatının artıq rəsmiləşdiyi barədə məlumat yayısa da, dünən bu xəbər özünü doğrultmadı.

Qeyd edək ki, "Axar.az"ın V.İsmayılovun 1-ci müavin təyin olunması xəbərinə aydınlıq gətirməkdən Binəqədi Rayon İcra Hakimiyyəti imtina etmişdi.