Türkiyədə bu dəfəki bələdiyyə seçkilərində ciddi qanun pozuntuları var və sübut olunacağı təqdirdə CHP bunun altında qala bilər.

Bu sözləri Axar.az-a açıqlamasında politoloq Ruslan Bəşirli deyib. Politoloq səslərin təkrar sayılması fonunda Binəlı Yıldırımın qələbəsini istisna etməyib:

“Fikir verin, Binəli Yıldırımın ailəsi ilə birlikdə səs verdiyi dairədə sadəcə 1 səs qeydə alınıb. Belə çıxır ki, Yıldırımın ailəsi ona səs verməyib? Türkiyədə bu dəfəki bələdiyyə seçkilərində ciddi qanun pozuntuları var və sübut olunacağı təqdirdə CHP bunun altında qala bilər”.

Politoloq müraciətlərlə bağlı bir məsələni də diqqətə çatdırıb:

“Seçkilərin nəticələri ilə bağlı müraciətlər nəinki Türkiyədə, eləcə də bütün dünyada var. Eyni zamanda, bəzi yerlərdə səslərin təkrar sayılması məsələsi ilk deyil. Buna görə də burada CHP-nin etirazına heç bir əsas yoxdur. CHP də iki məntəqədə səslərin yenidən sayılması ilə bağlı müraciət edib və seçkinin nəticələri onların xeyrinə dəyişib. AKP də bəzi dairələrdə səslərin yenidən sayılması ilə bağlı müraciətində çox haqlıdır. Məsələn, AKP-nin bazası İstanbulda Fateh rayonundadır, ancaq partiya bu ərazidən heç bir səs almayıb. İstanbulun 24 rayonunda AKP-nin namizədləri rayon bələdiyyə sədrliyinə seçilib, ancaq Binəli Yıldırım bu ilçələrdən qalib olmayıb. Bütün bunlar çox ciddi bir pozuntularıdır. Hər halda AKP-nin əlində seçki protokolları var və həmin sənədlər CHP bazasında da eyni formadadır. Bu mənada CHP-nin etirazları yerində deyil. Zənnimcə, səslərin təkrar sayılması və bütün qaranlıq məqamların aydınlığa qovuşması fonunda AKP-nin İstanbulda qələbəsi də mümkündür”.

Qeyd edək ki, ötən gündən İstanbulun 16 rayonunda etibarsız səslərin, 3 rayonunda isə bütün səslərin yenidən sayılmasına başlanılıb. İndiyə qədər 4 ilçədə səslərin təkrar sayımı başa çatıb.

AKP-dən verilən açıqlamada təkrar sayımdan sonra Ə.İmamoğlu ilə B.Yıldırım arasında səs faizlərinin kəskin azaldığı bildirilib. CHP isə bunun yekun nəticəyə ciddi təsir etməyəcəyini açıqlayıb.