"Türkiyə-Rusiya münasibətlərinin yeni bir səviyyəyə çatdığını artıq beynəlxalq dairələr də etiraf edir. Buna münasibətdə müxtəlif planlar quranlar olacaq. Çünki ötən əsrlər boyu iki dövlət arasında 13 dəfə baş verən müharibənin törədiciləri bəzən Qərb dairələri olub".

Bu sözləri Axar.az-a açıqlamasında millət vəkili Zahid Oruc deyib.

Onun sözlərinə görə, indiki məlum, həssas beynəlxalq şərait fonunda bu dövlətlər arasında iqtisadi ittifaqın genişlənməsi, xüsusilə də qaz resursu üzərində bağlanmış yeni sazişlər Türkiyənin Rusiya qazını Avropaya çıxaracaq mühüm bir hövzəyə çevrilməsi sıradan bir hadisə deyil:

"Bu, o deməkdir ki, regionda yeni bir iqtisadi ittifaq şəkillənməkdədir. Azərbaycan da bu prosesdə fəal rol oynaya bilər. Çünki Qərbin enerji ehtiyacının ödənilməsində, xüsusilə də "Cənub qaz dəhlizi" mühüm mövqe tutacaq, baxmayaraq ki, ixrac olunacaq qazın həcmi 10 milyard kub metrdən artıq deyil. Ancaq bura qoşulacaq digər dövlətlərin fonunda potensial həddən artıq böyükdür. Belə olan təqdirdə bu iqtisadi münasibətləri bir az daha irəli apararaq siyasi xətdə daha geniş addımların atılmasını axtarmalıyıq. Çünki öz-özlüyündə Qərb dairələri bölgədə müxtəlif proseslərdə aktiv iştirak etsələr də, Rusiya və Türkiyə Cənubi Qafqazda önəmli rol oynayır. Bu bizim marağımız dairəsindədir. Türkiyənin birbaşa iştirakı ilə Rusiya və Ermənistanın da qatıldığı dördtərəfli bir Qarabağ danışıqları başlanılsa, yaxşı olardı. Bu, praktikada heç vaxt olmayıb. Fəal bir tərəf, tanınmış bir dövlət olaraq Türkiyənin Qarabağ məsələsində mühüm yerini nəzərə alaraq onu həm də Ermənistana çağırtdırmaq naminə Rusiya və Türkiyə tərəfindən belə bir qərarın verilməsini çox istərdim. Təklif etdiyim bu format qətiyyən hansısa bir beynəlxalq quruma və ATƏT-in Minsk Qrupunu əvəz etməyə xidmət edəcək bir ideya deyil".

Millət vəkili bildirib ki, bütün hallarda müəyyən bir nəticəyə gəlinsə belə, yenə də Türkiyəsiz keçinmək mümkün olmayacaq:

"Fəal şəkildə bu proses Rusiya-Türkiyə arasındakı razılaşmalara bağlıdır. Qarabağ məsələsi öz-özlüyündə sadəcə bir ölkənin, indiki halda Azərbaycanın ərazisinin bir hissəsi problemi deyil. Qarabağ danışıqlarına və Türkiyə-Rusiya dialoqlarına Ermənistanın da qoşulmasının tərəfdarıyam. Görünən budur ki, iki dövlət arasında münasibətlər bundan sonra da inkişaf edəcək. Çünki bir sıra məsələlər bəyannamə səviyyəsindədir. Yeni razılaşmalar gözlənilir. Biz bu yöndə iqtisadi bağları siyasi müstəviyə daşımağı təklif edirik. Buna görə də Qarabağ məsələsinin 4 ölkə arasında danışıqlar predmeti olması hazırkı dövrün əsas tələblərindən biridir".