"Dərbənddəki bütün bu proseslərin arxasında Dağıstan Prezidenti Ramazan Abdulatipovun dayanması təsadüfi deyil".

Bu sözləri Axar.az-a açıqlamasında politoloq Ərəstun Oruclu söyləyib.

O, Dağıstanda etnik münaqişə yaranacağı təqdirdə onun Azərbaycana keçmə təhlükəsinin olduğunu bildirib:

"Dağıstanda bu tip qarşıdurmalar daim Azərbaycanın xarici siyasət kursunda müəyyən dəyişmələr baş verdikdə özünü göstərir. Bir ara Bakı tərəfindən Vaşinqtonun və Qərbin ünvanına çox sərt tənqidlər səsləndirilirdi. Bu ərəfədə heç nə baş vermirdi. İndi diqqət yetirsəniz görərsiniz ki, Azərbaycan Almaniya rəhbərlərinin görüşü, Davos tədbiri, Münhen konfransı, "Cənub qaz dəhlizi" qaz müqaviləsi iştirakçılarının Bakıda görüşü, Azərbaycan parlamentində Konqresə cavab olaraq ABŞ-Azərbaycan münasibətlərinə dair dinləmələrdən sonra növbəti dəfə Dərbənddə gərginlik yarandı. Bakıda keçirilən dinləmələrin tonu kifayət qədər yumşaq idi. Budəfəki dinləmələrdə hakimiyyəti və iqtidar partiyasını təmsil edənlərin səsləndirdikləri fikirlər tamamilə fərqliydi. Bunları həmin proseslərlə əlaqələndirmək lazımdır. Dərbənddəki bütün bu proseslərin arxasında Dağıstan Prezidenti Ramazan Abdulatipovun dayanması təsadüfi deyil. Artıq mübarizənin milli-etnik bazada klanlararası müstəviyə keçməsi bunu sübut edir. Ənənəvi olaraq həmişə Dərbənddə əsas söz sahibi azərbaycanlılar olub. Bu da təbiidir. Çünki Dərbənd azərbaycanlıların şəhəridir. Məhz Abdulatipov gəldikdən sonra bu balansı pozmağa çalışdılar. Bu işdə müəyyən uğur da əldə ediblər. Şübhəsiz ki, Dərbənddəki proseslərdə qruplararası maraq da var. Çünki bir şəhərə nəzarət böyük bir kapitala nəzarət etmək deməkdir. Amma eyni zamanda bu işə "Sadval"ın qoşulması, onun dezinformasiyalar yayması və ya qabaqlayıcı xəbərlər verməsi artıq bu məsələdəki siyasi çalardan xəbər verir. Hamı yaxşı bilir ki, "Sadval" Rusiya xüsusi xidmət orqanlarının yaratdığı və idarə elədiyi separatçı qurumdur. Əslində, Dərbənddəki mübarizənin klanlararası mübarizədən etnik-klanlarası müstəviyə keçirilməsi həm də Azərbaycana mesajdır. Prinsip etibarilə orada hansısa etnik münaqişə yaranarsa, onun Azərbaycana keçmə təhlükəsi var. Bir daha bunların hamısını nəzərə alaraq, bildirmək istəyirəm ki, burada Rusiya hakimiyyətinin iştirakı var. Bu, artıq çox açıq görünür".