"Teleqraf" MMC media qrupun rəhbəri Aynur Camalqızı Lider TV-də yayımlanan "Səda 24" proqramında iştirak edib.

Axar.az xəbər verir ki, Bakı-2015 I Avropa Oyunlarının ölkəmizdə keçirilməsi ilə bağlı sualları cavablandıran media qurumun rəhbəri oyunlar zamanı medianın üzərinə düşən vəzifədən danışıb. Onun sözlərinə görə, oyunların Azərbaycanda keçirilməsi bizə əlavə dividentlər qazandırır:

"Belə bir beynəlxalq yarışmanın Azərbaycanda keçirilməsi ölkəmiz üçün çox böyük dividentlər gətirən bir hadisədir. İlk Avropa Oyunlarının Azərbaycanda keçirilməsi bizə çox gözəl fürsətlər verir ki, ölkəmizi dünyada tanıdaq. Ümumiyyətlə, bu cür böyük tədbirlər keçirilərkən o tədbirlərin keçirildiyi ölkələrdə üç əsas amil nəzərə alınır. Birinci, əlbəttə ki, təhlükəsizlik məsələsidir. İkincisi, maliyyə məsələsi, üçüncüsü isə təcrübə məsələsidir. Təhlükəsizliyə gəlincə, Azərbaycan təbii ki, kifayət qədər stabil bir ölkədir. Azərbaycan bütün beynəlxalq qarşıdurmaların fövqündə dayanmağı bacardı. Təsəvvür edin ki, son 10 ildə Azərbaycan 300-dən artıq beynəlxalq tədbirə ev sahibliyi edib. Bunu müqayisə etmək üçün dünyada ikinci bir ölkə yoxdur".

Avropa Oyunları zamanı medianın üzərinə böyük vəzifə düşdüyünü deyən Aynur Camalqızı Azərbaycanın Avropa mədəniyyətinin bir parçası olduğunu və bu istiqamətdə təbliğat işlərinin aparıldığını bildirdi:

"Şübhəsiz ki, əgər ölkəmizdə belə bir beynəlxalq tədbir keçirilirsə, biz media nümayəndələrinin də üzərinə çox böyük işlər düşür. Ümumiyyətlə, idman yarışları bir mədəniyyət hadisəsidir. Və Avropaya inteqrasiya prosesində Azərbaycan üçün gözəl fürsətlər açan bir hadisədir. Yəni biz bu tədbirin Azərbaycanda keçirilməsi ilə Avropaya daha sürətlə inteqrasiya etmək şansı qazanmışıq. Azərbaycan Avropa mədəniyyətinin multikultural bir parçasıdır. Media nümayəndəsi olaraq bu tədbirin keçirilməsinin əhəmiyyətini istər ölkə ictimaiyyətinə, istərsə də dünyaya çatdırmaq üçün öz imkanlarımızdan geniş istifadə edirik. Demək olar ki, bütün idman infrastrukturu oyunlara tam hazırdır. Qarşıdan bildiyiniz kimi 2017-ci il İslam Həmrəyliyi Oyunları da keçiriləcək. Bu da çox böyük beynəlxalq əhəmiyyəti olan yarışma olacaq. Biz həmin yarışlarda artıq hazır olacağıq".

Daha ətraflı bu linkdən izləyə bilərsiniz.