Ana səhifə Gündəm |
Amerika və Böyük Britaniyanın Rusiyaya yeni sanksiyalar tətbiq etməsi qaçılmazdır.
Bu sözləri Axar.az-a açıqlamasında gürcü ekspert, politoloq Gela Vasadze ABŞ və Britaniyanın Rusiyaya yeni sanksiyalar tətbiq etmə ehtimalından danışarkən deyib.
Ekspertin sözlərinə görə, bu, 2007-ci ildə Putinin Münhen nitqindən sonra qaçılmaz hala gəlib:
“Lakin Qərb bunu yalnız Krımın ilhaqından və Avropa ölkəsinin daxili siyasətinə müdaxilə cəhdlərindən sonra başa düşüb. Rəsmi Moskva Qərbə qarşı yeni bir Soyuq müharibə başladıb. Uzun müddət Vaşinqtonda və Avropa paytaxtlarında bunun mümkün olduğuna inanmaq istəmədilər. Bəziləri hələ də buna inanmır, lakin artıq inanmayanlar azlıq təşkil edir. Sanksiya siyasəti Qərbin Rusiyaya qarşı apardığı mübarizənin yalnız görünən tərəfidir”.
Politoloq, həmçinin sanksiyaların tətbiq ediləcəyi təqdirdə Rusiyanın buna hər hansı bir müqavimət göstərməyəcəyini də qeyd edib:
“Əlbəttə ki, reaksiya olacaq, amma gəlin realist olaq, bu gün Rusiya Federasiyasının ABŞ-a və ya Avropaya həqiqətən zərər vermək üçün kifayət qədər resursları yoxdur. Odur ki, Kreml tərəfindən verilən reaksiya əsasən göstəriş xarakterli olacaq”.
G.Vasadze sözügedən sanksiyaların tətbiqinin Rusiya daxilindəki vəziyyətə ciddi bir təsir göstərməyəcəyindən də danışıb:
“Qərb Rusiya elitasının daxilindəki vəziyyəti gərginləşdirməyə çalışır. Tətbiq olunacaq yeni sanksiyaların Rusiya daxilindəki güc nisbətini kökündən dəyişdirəcəyi ehtimalı yoxdur”.
Qeyd edək ki, bu gün “Blumberq” agentliyi ABŞ və Böyük Britaniyanın kimyəvi silah istifadəsinə görə Rusiyaya yeni sanksiyalar tətbiq etməyi planlaşdırdığına dair məlumat yayıb.
Tarix
2021.03.05 / 13:22
|
Müəllif
Xədicə Nəbiyeva
|