09:00

Azərbaycan Ordusu artıq Şuşanı azad etmiş və Xankəndinin ətrafına daxil olmuşdu. Ordumuzun Xankəndini tezliklə azad edəcəyi sirr deyildi və bundan sonra əsgərlərimiz irəliləyərək, Xocalını, cənub tərəfdən də Xocavəndi düşməndən təmizləyəcəkdi. Bunun nəticəsində Ağdərə istiqamətində 20-25 min erməni əsgəri mühasirəyə düşəcəkdi.

Bu sözləri Axar.az-a Azərbaycan, Rusiya və Ermənistan liderlərinin 44 gün davam edən müharibənin dayandırılması barədə imzaladığı birgə bəyanatın ildönümü barədə danışan politoloq Turab Rzayev deyib.

O bildirib ki, Ağdərə istiqamətində mühasirəyə alınan erməni ordusu məhv ediləcəkdi:

“Bunu anlayan Ermənistan rəhbəri təcili olaraq Rusiyadan Azərbaycanla danışıqlar apararaq, kapitulyasiyanı imzalamağa hazır olduğunu bildirdi”.

Politoloqun sözlərinə görə, Azərbaycanın bu bəyanatı imzalamasının öz səbəbləri vardı:

“Birincisi odur ki, Xankəndi şəhərində bir neçə min erməni əhalisi qalmışdı. Ermənilər orada qəsdən mülki əhalinin həlak olmasına çalışacaqdılar. Bu isə dünyada böyük səs-küyə səbəb olacaq, “etnik təmizləmə” adı altında Qərb ölkələri Azərbaycana təzyiq göstərəcəkdi, hətta Kosova ssenarisinin təkrarlanması ilə bağlı Azərbaycana qarşı hədələr vardı.

İkincisi məsələ ondan ibarətdir ki, artıq havalar soyuyurdu, Azərbaycan Ordusunun xüsusi ilə dağlıq ərazilərdə əməliyyat aparması çətinləşirdi.

Üçüncü məsələ isə odur ki, Azərbaycan Ordusu Laçın və Kəlbəcər rayonlarının azad edilməsində itki verə bilərdi. Çünki həmin rayonlar Ermənistanla sərhəd olduğuna görə düşmən ölkədən daim dəstək alacaqdılar. Bütün bunları nəzərə alaraq, Azərbaycan Kəlbəcər, Laçın və Ağdamın Azərbaycana qansız qaytarılması qarşılığında, eyni zamanda Zəngəzur dəhlizinə görə bu sülh bəyanatının imzalanmasını vacib bildi. Azərbaycanın üçtərəfli bəyanatla müharibə ilə əldə edəcəklərini diplomatiyada həyata keçirmək üçün imkan qazandı. Məcburi köçkünlərin geri qayıtması tələbi, erməni ordusunun Azərbaycan ərazisindən tam çıxarılması və s. şərtlərini diktə etdi. Əlbəttə, müharibə ilə bu prosesi daha qısa müddətdə və kökündən həll edə bilərdi. Ancaq bir qədər uzunmüddətli prosesə getməklə əvəzində Ordumuzun itkisinin qarşısını aldı, Qərbin mümkün təzyiqlərini neytrallaşdırdı və qələbəni tanıtmaq üçün daha güclü rıçaqlar əldə etdi”.