İran Xarici İşlər nazir Məhəmməd Cavad Zərif Ankaraya yeni Suriya planı ilə birgə gələcək.

Axar.az xəbər verir ki, bu iddia ilə Türkiyənin "Yeni Şafak" qəzeti çıxış edib.

Qəzetin iddiasına görə, Zərifin yeni planında Türkiyəyə Livanla sərhədin və Tartus limanının Əsəd rejiminin tabeliyində qalması təklif olunacaq:

"Yeni plana əsasən Dəməşq, Lazkiye, Tartus, Zebadani və Kalamun vilayətləri Əsəd hakimiyyətinə veriləcək. Buralarda yaşayan sünni əhalinin təhlükəsiz şəkildə bölgədən çıxarılması həyata keçiriləcək. Müxaliflərin idarə etdiyi ərazilərdə yeni idarəetmə sistemi qurulacaq. Bir qismi müxaliflərdə, digər qismi isə Əsəd ordusunun əlində olan Hələbin isə beynəlxalq koalisiyanın idarəsinə verilməsi tələb ediləcək".

Artıq bir neçə suriyalı müxalif lider İranın bu planına qarşı çıxıb. Müxaliflər yeni planın ölkədə məzhəb savaşını sürətləndirəcəyini və Suriyanı tam olaraq böləcəyini bildirirlər.

Xatırladaq ki, İran Xarici İşlər naziri sabah Türkiyəyə səfər edəcək. O, Ankaradan sonra Rusiya və Livana uçacaq.