ATƏT-in Media azadlığı üzrə nümayəndəsi Dunya Miyatoviç jurnalist Rasim Əliyevin qətlində təqsirləndirilən şəxslərə verilmiş hökmü alqışladığı barədə bəyanatla çıxış edib.

APA-nın ATƏT-in saytına istinadən verdiyi xəbərə görə, Miyatoviç həmçinin bir sıra jurnalist, insan haqları müdafiəçilərinin prezidentin 17 mart tarixli əfv fərmanı ilə azadlığa buraxılmasını da müsbət qiymətləndirdiyini bəyan edib.

Miyatoviç rəhbərlik etdiyi qurumun media azadlığı və jurnalistlərin təhlükəsizliyi istiqamətində Azərbaycan hökuməti ilə əməkdaşlığa hazır olduğunu qeyd edib.

Qeyd edək ki, bu gün Bakı Ağır Cinayətlər Məhkəməsində jurnalist Rasim Əliyevin ölümündə təqsirləndirilən Elşən İsmayılova 13, Camal Məmmədova 11, Arif Əliyevə 12, Kənan Mədətov və Samir Mustafayevə 9 il həbs cəzası verilib.