Bu gün tanınmış jurnalist, sənətşünas Ənvər Börüsoyun məzarı ziyarət edilib.

Bu barədə Kult.az-a hüquqşünas Səməd Vəkilov məlumat verib.

Onun sözlərinə görə, 7 mərasimi ilə əlaqədar Ənvər Börüsöyun Hövsan qəbiristanlığındakı məzarı ziyarət edilib, ruhuna dualar oxunub.

Ziyarət edənlər sırasında Azərbaycan Jurnalist Qadınları Assosiasiyasının rəhbəri, İctimai Televiziya Yayım̧ Şurasının üzvü Sevil Karani Yusifova, Atatürk Mərkəzinin şöbə müdiri, tədqiqatçı alim Nəzir Əhmədli, Beynəlxalq Avrasiya Fondunun rəhbəri Ümud Mirzəyev, Azərbaycan Dövlət Akademik Milli Dram Teatrının aktyorları İlqar Cahangir, Elnur Qədirov, Elçin Əfəndi, Hacı Teymur, Ənvər Börüsoyun tələbəsi Lalə Cəbrayıl, rəssam Lalə Hüseynova və mərhumun ailə üzvləri iştirak ediblər. Dostları onun ölümünü Azərbaycan ictimaiyyəti üçün böyük itki adlandırıblar.

Qeyd edək ki, ictimaiyyətin Ənvər Börüsoy kimi tanıdığı Ənvər Yusif oğlu Məmmədov 01.04.1961-ci il tarixində Gəncə şəhərində anadan olub. Əvvəlcə Əzim Əzimzadə adına rəssamlıq məktəbini, sonra isə Azərbaycan Dövlət İncəsənət Universitetini bitirib. Milli azadlıq hərəkatının fəallarından olub. Geniş dünyagörüşə və intellektual səviyyəyə malik olan Ənvər Börüsoy türk dünyası ilə bağlı çoxsaylı araşdırmaların müəllifidir. Qafqaz Siyasi Texnologiya Mərkəzinin rəhbəri kimi geniş spektrli fəaliyyəti olub.