Türkiyədə futbol hakimlərinin mərc oyunlarında iştirak etdikləri üzə çıxıb.

Axar.az xəbər verir ki, bu barədə Türkiyə Futbol Federasiyasının (TFF) prezidenti İbrahim Hacıosmanoğlu məlumat verib.

O qeyd edib ki, aktiv hakimliklə məşğul olan 571 nəfərdən 371-nin mərc oyunlarına pul yatırmaq üçün hesablarının olduğu müəyyənləşib.

Eyni zamanda, 152 hakimin mərc oyunlarına pul qoyduqları təsdiqlənib.

TFF rəhbəri bildirib ki, TFF-nin Nizam-İntizam Komitəsi bu gündən etibarən lazımi işlərə başlayacaq və müvafiq cəzaları açıqlayacaq.

İ.Hacıosmanoğlu məsələ ilə bağlı FİFA və UEFA-ya da məlumat verdiklərini vurğulayıb.

Qeyd edək ki, qaydalara əsasən mərc oyunlarına pul qoyuluşu edən hakimlər 5 ilədək futbol matçlarını idarə etməkdən uzaqlaşdırıla bilərlər.