Bu oyuna adi bir matç kimi yanaşmaq olmaz, qarşılaşma çox vacibdir. Ola bilsin ki, azarkeşlər turnir cədvəlinə məndən daha çox baxır və oyunları daha dərindən analiz edirlər. Bəlkə mən bəzi detallara toxunmuram, amma fanatlar bunları görür.

Axar.az xəbər verir ki, bunu “Qarabağ”ın çalışdırıcısı Qurban Qurbanov “Karvan-Yevlax”la keçirilən oyundan (2-0) sonra mətbuat konfransında Çempionlar Liqasının Liqa mərhələsinin VI turunda “Ayaks”la matç barədə danışarkən deyib.

“Biz isə diqqətimizi tam oyuna yönəltməliyik, bunun futbolçulara da müsbət təsiri olar. Çempionat matçına hazırlaşmaqla yanaşı, fikrimizdə həmin görüşü də tuturuq. "Ayaks"ın özünəməxsus oyun fəlsəfəsi var, bir neçə oyunlarını izləmişəm. “Benfika” ilə matçda daha çox qol epizodları oldu, nəinki onların. Məni ən çox narahat edən indiki yanaşmadır: sanki rəqib sonuncu pillədədir deyə, qələbə indidən bizimdir. Bu arxayınlıqdan uzaqlaşmaq lazımdır. "Ayaks" da qarşıdakı oyunlara, xüsusilə də bizimlə matça köklənib. Çox ciddi və diqqətli olmalıyıq. Ötən mövsüm Avropa Liqasında qrupda sonuncu olsaq da, 3-4 oyunda rəqibdən üstün idik. Sadəcə qismət olmadı. Bəlkə də daxildə nələrisə səhv etmişdik, ya da kollektivdə lazımi səmimiyyət və dostluq atmosferi yox idi”, - Q.Qurbanov qeyd edib.