Mayamidə fəaliyyət göstərən və idman, musiqi tədbirlərinin təşkili üzrə ixtisaslaşan VID şirkəti "İnter Mayami"nin hücumçusu Lionel Messini və Argentina Futbol Assosiasiyasını (AFA) məhkəməyə verib.

Axar.az Qol.az-a istinadən xəbər verir ki, bu barədə TMZ nəşri məlumat yayıb. Buna səbəb tərəflər arasındakı müqavilə şərtlərinin pozulması olub.

Belə ki, VID şirkəti ötən ilin oktyabrında Argentina millisinin Venesuela (1:0) və Puerto-Riko (6:0) yığmaları ilə keçirdiyi iki yoldaşlıq oyununun təşkili üçün eksklüziv hüquqların əldə edilməsinə dair AFA ilə 7 milyon dollar dəyərində müqavilə bağlayıb. Razılaşmaya əsasən, Messi zədələnmədiyi təqdirdə hər matçda ən azı 30 dəqiqə meydanda olmalı idi.

Lakin argentinalı ulduz Venesuela yığması ilə oyunda iştirak etməyib. Əvəzində o, ertəsi gün MLS çərçivəsində "Atlanta"ya qarşı keçirilən matçda (4:0) forma geyinib və dubla imza ataraq üstəlik 1 məhsuldar ötürmə də edib.

Qeyd edək ki, şirkət rəhbərliyi 38 yaşlı superulduzun meydançaya çıxmaması səbəbindən milyonlarla dollar gəlir itirdiyini iddia edir. Hazırda şirkət vurulan bütün maddi zərərlərin ödənilməsini və əlavə təzminat tələb edir.