Aprelin 26-da Londonda orta çəkidə (72,6 kq) reytinq döyüşünə çıxacaq böyük britaniyalı boksçular Kris Yubenk və Konor Bennin mətbuat konfransı qalmaqalla yekunlaşıb.

Axar.az Teleqraf-a istinadla xəbər verir ki, baxışlar dueli zamanı keçmiş dünya çempionu Yubenk yumruğunda gizlətdiyi yumurtanı rəqibin sifətinə çırpıb. Qəzəblənmiş Benn cavab vermək istədikdə, bu, toqquşmaya çevrilib. Lakin boksçuları vaxtında aralamaq mümkün olub.

İnsidentin ardından zərərçəkən onu incidənə sosial şəbəkə vasitəsilə müraicət edib: “Bu, mənə vura biləcəyin yeganə zərbə idi. Bitdin. İkinci raundda oturacaqsan”.

Qeyd edək ki, Kris Yubenk və Konor Benn arasında döyüş 2022-ci ildə baş tutmalı idi. Lakin həmin vaxt Benn dopinq-testdən keçə bilməyib. O, orqanizminə qadağan olunmuş maddələrin yumurta qəbulu nəticəsində düşdüyünü bildirib. Görünür, Yubenk yumurta çırpmaqla, rəqibinə həmin olayı xatırlatmaq istəyib.

Videoya baxmaq üçün BURA keçid edin.