Avstriyanın OMV konserni Türkiyədəki törəməsi olan “Petrol Osifi AŞ”-ni Hollandiyanın “Vitol Group” şirkətinə satacağını açıqlayıb.

APA OMV-nin açıqlamasına istinadən xəbər verir ki, əqdin dəyəri 1 mlrd. 368 mln. avro təşkil edəcək.

“OMV “Petrol Ofisi”nin səhmlərin 100%-ni “Vitol Group”a satacağını bəyan edir. Alqı-satqı proseduru bu ilin üçüncü rübündə başa çatdırılacaq”, - deyə şirkətin bəyanatında qeyd edilib.

Bundan öncə konsern rəsmiləri bəyan edib ki, “Saudi Aramco”, SOCAR və “Vitol Group” “Petrol Ofisi”nə sahiblənməyə daha yaxın şirkətlərdir. “Bloomberg” agentliyinin yazdığına görə, “Saudi Aramco” rəqiblərindən bir addım öndə idi. Belə ki, Səudiyyə Ərəbistanı nəhəngi “Petrol Ofisi”üçün 1,6 mlrd. dollarından keçməyə hazır olub.

"Reuters" agentliyinin mənbələri isə qeyd edib ki, SOCAR da OMV-yə öz təkliflərini göndərib.

Bundan öncə "SOCAR Türkiye Enerji A.Ş."-nin baş icraçı direktoru Zaur Qəhrəmanov bildirib ki, SOCAR "Petrol Ofisi"nin alışından imtina edə bilər. Bununla yanaşı, Z. Qəhrəmanov "Petrol Ofisi"nin SOCAR üçün ən uyğun variant olduğunu da dilə gətirib: "Təbii ki, dəyərləndirmələrimiz davam edir. "Petrol Ofisi"nin alışını baş tutmazsa, şirkətin "B" və "C" planı da var. Başqa şirkətlərin satın alınması və sıfırdan bir şirkətin qurulması baş tuta bilər".

SOCAR-a YDM məntəqəsi STAR neft emalı zavodu ilə inteqrasiya üçün lazımdır. Türkiyənin İzmir şəhərində yerləşən zavod 2018-ci istismara veriləcək.

"Petrol Ofisi"nin Türkiyə ərazisində 1000-ə yaxın YDM-i var. Son statistikaya əsasən, şirkət bazarın 22,7%-nə nəzarət edir.