"Fondun valyuta portfelində digər valyutaların həcmi 5 faizdən 10 faizə qaldırılıb ki, bu da təxminən 1,8 milyard ABŞ dollarına bərabərdir".

Bunu Axar.az-a ABŞ-ın "Faynenşl Tayms" (The Financial Times) qəzetində ARDNF haqqında yazılan yazıya aydınlıq gətirən qurumun İctimaiyyətlə əlaqələr şöbəsinin müdiri Cəmalə Əliyeva bildirdi. C. Əliyevanın fikrincə, "Faynenşl Tayms"dan tərcümə edilərək Azərbaycan mətbuatında yayılan məlumatda müəyyən yanlışlığa yol verilib:

"Qəzet ARDNF-nin İcraçı direktoru Şahmar Mövsümovdan müsahibə almışdı və müsahibədə qeyd edilən qəzetin jurnalisti tərəfindən "1,8 milyard ABŞ dollarına qədər vəsait Çin yuanına investisiya edilə bilər", deyə qeyd edilmişdi. Lakin bu məsələ bir sıra yerli saytlarda dəqiq tərcümə edilmədən verilib. Müsahibədə də qeyd edildiyi kimi, Fondun valyuta portfelində digər valyutaların həcmi 5 faizdən 10 faizə qaldırılıb ki, bu da təxminən 1,8 milyard ABŞ dollarına bərabərdir. Qeyd edilən bu vəsaitin digər valyutalara, o cümlədən Çin yuanına investisiya edilməsi planlaşdırılır".

Xatırladaq ki, bir sıra media orqanlarında ABŞ-da nəşr olunan "Faynenşl Tayms" qəzetində "Azərbaycan Dövlət Neft Fondu 1,8 milyard dollar məbləğində vəsaiti yuana çevirəcəkdir" sərlövhəli məqalə dərc edilməsi və Azərbaycan Respublikası Dövlət Neft Fondunun təxminən 1,8 milyard dollar məbləğində vəsaiti yuana (Çinin milli valyutasına) çevirməyi planlaşdırması ilə bağlı məlumat yayılıb.