Bazar həcminin inkişaf edən aktiv artım tempinə görə Rusiya ilk "Böyük Yeddiliyə" daxil olub.

Axar.az xəbər verir ki, "Faynenşl Tayms" ("The Financial Times") ekspertlərin dünya iqtisadiyyatının inkişafının perspektivləri haqqında Beynəlxalq Valyuta Fondunun məruzəsini təhlil edib, bu nəticəyə gəldikləri barədə məlumat yayıb.

Yeni "yeddiliyə" Rusiya, Çin, Hindistan və Braziliya daxildir. Meksika, İndoneziya və Türkiyə iqtisadiyyatında da böyük artım olduğu müşahidə edilir. Ümumi həcm 37,8 trilyon dollara bərabərdir. ABŞ, Böyük Britaniya, Kanada, Fransa, Almaniya, İtaliya və Yaponiyada isə bu göstərici 34,5 trilyon dollar təşkil edir.

Ekspertlərin araşdırmasına görə, dünyada vəziyyət dəyişir, inkişaf edən ölkələr dünyanın 20 ən böyük iqtisadiyyatından 10-a sahib olur. İndoneziya siyahıda doqquzuncu yerə yiyələnməklə, Böyük Britaniyanı da ötüb keçir.

Beynəlxalq Valyuta Fondunun məlumatına görə, bu il Çin iqtisadiyyatın həcminə görə liderə çevriləcək.

İqtisadi İnkişaf Nazirliyinin rəsmi proqnozuna əsasən, 2014-cü ilin nəticəsinə görə, Rusiyanın iqtisadiyyatı 0,5 faiz artacaq.