"Manatın sabit qalması yerli sahibkarlığa problem yaradır. Amma Mərkəzi Bank ilin sonuna qədər manatı sabit saxlamağa çalışacaq".

Bu sözləri Axar.az-a iqtisadçı Samir Əliyev Rusiya, Gürcüstan, Türkiyə valyutasının ucuzlaşmasına baxmayaraq, bunun Azərbaycanda manata heç bir təsir etməməsindən danışarkən bildirib.

İqtisadçının fikrincə, manat MDB ölkələri arasında ən stabil valyutalardan biridir:

"Ancaq digər MDB ölkələrində bunun şahidi olmuruq. Bunun obyektiv və subyektiv səbəbləri var. Rusiya və Ukraynada baş verən son proseslər birbaşa milli valyutanın məzənnəsinin ucuzlaşmasına gətirib çıxardı. Ukraynada Krımın işğalından sonra yaranmış böhran, Rusiyada isə neftin ucuzlaşması və tətbiq edilən sanksiyalar milli valyutaya təsir etdi. Ötən il üçün bu iki ölkə valyutası dünyada ən zəif valyuta oldu. Azərbaycan istisna olmaqla, MDB ölkələri, həmçinin Gürcüstan və Türkiyədə milli valyutalar ucuzlaşdı.

Ancaq Mərkəzi Bank manatın stabilliyini qorudu. 2008-ci ildə də eyni proses baş vermişdi, dünya böhranı zamanı da manatda heç bir dəyişiklik olmamışdı".

S.Əliyev qeyd edib ki, manatın kursunu sabit saxlamaqda məqsəd əhalinin sosial vəziyyətinin pisləşməsinin qarşısını almaqdır:

"Mərkəzi Bank həmişəki kimi risk edərək manatın kursunu sabit saxladı. Bu gün də Mərkəzi Bank eyni siyasəti yeridir. MB 2015-ci il üzrə pul kredit siyasəti ilə bağlı proqramını açıqlayanda bildirdi ki, manatın sabitliyi qorunacaq. Bank manatın sabitliyinin proritetliyinə üstünlük verir. Məqsəd də əhalinin sosial vəziyyətinin pisləşməsinin qarşısını almaqdır".

İqtisadçı əlavə edib ki, Mərkəzi Bankın bu addımı yerli sahibkarlığa əslində problem yarada bilər:

"Çünki xaricdən gələn mal daha ucuz başa gəlir və təbii ki, bizim mallar baha olduğundan əhali də xaricdən gətirilən məhsullara üstünlük verir. Bu da birbaşa yerli sahibkarlığa ziyan vura bilər".

S.Əliyev bu il ərzində manatın kursu ilə bağlı proqnozunu da açıqladı:

"Bu il manatın kursunun sabit qalacağını praqnozlaşdırırıq. Ancaq yenə də hər şey dünyada baş verəcək proseslərdən asılıdır. Konkret olaraq neftin qiymətindən. Əgər neft indiki səviyyədə qalarsa və bu il ərzində belə davam edərsə, ilin ortalarında artıq Mərkəzi Bank manatın məzənnəsinə yenidən baxa bilər. Bütün hallarda isə Mərkəzi Bankın həmişəki kimi manatın kursunu saxlamağa çalışacağını düşünürük".