"Rusiya Ukraynadan keçən borulara görə tranzit xərclərini ödəməyə məcburdur. Bu isə Ukrayna iqtisadiyyatına kömək etmək anlamına gəlir. Ona görə də siyasi rəqabət olduğundan və iki ölkə arasında elan olunmamış bir müharibə getdiyindən Rusiya Ukrayna üzərindən qaz keçidini maksimal dərəcədə azaltmağa çalışacaq".

Bu sözləri Axar.az-a açıqlamasında iqtisadçı ekspert Natiq Cəfərli Rusiyanın Ukrayna üzərindən Avropa Birliyinə qaz nəqlini azaltmaqla "Şimal axını"nı gücləndirməsinə münasibət bildirərkən deyib.

Ekspertin sözlərinə görə, Rusiyanın atacağı addımlardan biri "Şimal axını"ndan qaz nəqlinin artırılması olacaq:

""Şimal axını" Baltik dənizindən birbaşa Almaniyaya keçən ən böyük sualtı qaz kəməridir. Sadəcə, problem ondan ibarətdir ki, Ukrayna üzərindən keçən qazın böyük əksəriyyəti cənub-şərqi Avropa ölkələrinə - keçmiş sovet ölkələri sayıla biləcək bloka gedir. Yəni Slovakiya, Bolqarıstan, Macarıstan, Rumıniyaya, oradan da Avstriyaya qədər məhz Ukrayna üzərindən qaz çatdırılırdı. Ancaq "Şimal axını"nın belə bir gücü və uzantısı yoxdur. Çünki "Şimal axını" Almaniyada bitir. Cənub-şərqi Avropa ölkələrinə bu axın vasitəsilə qazın çatdırılması çox çətin və bahalı bir proses ola bilər. Ona görə də hesab etmirəm ki, ruslar Ukrayna üzərindən daha kəskin azaltmalara getsinlər. Bundan əlavə Rusiyanın yeni layihəsi "Türk axını" 2016-cı ildən reallaşmağa başlayacaq. Bu yolla Rusiya Ukraynadan qaz tranziti asılılığını azaltmaqla iqtisadi yardımı aradan götürməyə çalışacaq".

Ekspertin sözlərinə görə, Avropa hazırda onun üçün önəm daşıyan enerji layihələrində iştirakçıların sayının artmasında olduqca maraqlıdır:

"Cənub qaz dəhlizi gələcəkdə Azərbaycana çox böyük dividentlər gətirəcək. Azərbaycan 2019-2020-ci ildə Türkiyə üzərindən Avropa bazarına 12 milyard kub metr qaz çıxara biləcək. Ancaq bu, Avropa üçün yetərli deyil. Buna görə də Avropa bu layihədə iştirakçı ölkələrin sayının artmasında maraqlıdır. Çox güman ki, Türkmənistanın buraya qoşulmasını istəyəcəklər. Hətta gələcəkdə İran və İraqın da buraya qoşulmasını həll etməyə çalışacaqlar. Bu layihə, əslində, Avropaya Rusiya qazından asılılığı azaltmaq üçün ciddi alternativdir. Siyasi problemlər həll olunsa, bu ölkələr də Azərbaycanla birlikdə "Cənub axını"nda iştirak edə biləcəklər".