Rövnəq Abdullayev Cahangir Əliyevi SOCAR-ın Fəxri Fərmanı ilə təltif edib.

ARDNŞ-dən Axar.az-a verilən məlumata görə, bu gün Dövlət Neft Şirkətinin baş ofisində şirkətin prezidenti Rövnəq Abdullayev Azərbaycan Neft və Qaz Sənayesi İşçiləri Həmkarlar İttifaqı Respublika Komitəsinin sədri Cahangir Əliyevi qəbul edib.

Şirkətin prezidenti anadan olmasının 60 illiyi münasibəti ilə Cahangir Əliyevi təbrik edib və bildirib ki, o, 1996-cı ildən indiyə qədər Azərbaycan Neft və Qaz Sənayesi İşçiləri Həmkarlar İttifaqı Respublika Komitəsinin sədri vəzifəsində ölkəmizin neft-qaz sənayesi həmkarlar hərəkatına uğurla rəhbərlik edir. Cahangir Əliyev həm də Beynəlxalq Neft və Qaz Sənayesi İşçiləri Konfederasiyasının Baş katibinin müavini kimi səmərəli fəaliyyət göstərir. Rövnəq Abdullayev Azərbaycan neft-qaz sənayesinin inkişafında xüsusi xidmətlərinə görə Cahangir Əliyevi Azərbaycan Respublikası Dövlət Neft Şirkətinin Fəxri Fərmanı ilə təltif etdiyini söyləyib və mükafatı ona təqdim edib.

Cahangir Əliyev səmimi təbriklərinə görə SOCAR prezidenti Rövnəq Abdullayevə təşəkkürünü bildirib.