Mart ayının sonuna Mərkəzi Bankın xarici valyuta ehtiyatları 4 milyard 65 milyon dollar olub. Bu əvvəlki ayla müqayisədə 39,5 milyon dollar və ya 1 faizə yaxın artım deməkdir.

Axar.az xəbər verir ki, bu haqda iqtisadçı alim Vüqar Bayramov yazıb. Ekspertin sözlərinə görə, MB-nin valyuta ehtiyatlarını qoruyub saxlaması ötən ay hərraclarda Dövlət Neft Fondunun dolları təklif etməsi ilə bağlıdır:

"Hərraclara qatılmayan MB öz valyuta ehtiyatlarını qoruyub saxlaya bildi. Eyni zamanda, Azərbaycanda dövriyyədə olan manat kütləsi 6 milyard 535,8 milyon manata çatıb. Bu, fevral ayının yekunu ilə müqayisədə 147,3 milyon manat çoxdur. Deməli, bir tərəfdən MB-nin xarici valyuta ehtiyatlarında, digər tərəfdən isə manat bazasında cüzi artımlar baş verib".

V.Bayramov son hərraclarda Dövlət Neft Fondunun satışa çıxardığı dollara tələbin olduqca az olmasına diqqət çəkib:

"Hətta son hərracda fond 100 milyon dollardan cəmi 1 milyon dolları sata bilmişdi. Bu isə dollarlaşma səviyyəsinin yüksək olması və bazarın xarıcı valyuta təklifi nəticəsində hərraclara çıxarılan pula tələbin olmaması ilə bağlıdır. Amma Dövlət Neft Fondu öz xərcləmələri üçün dollarını manata çevirməlidir. Başqa cür öz xərcləmələrini, o cümlədən, büdcəyə köçürmələri edə bilməz. Banklar isə həmin pulu almırlar. Deməli, proses belə gedə bilməz. Bütün hallarda Fondun dolları satılmalıdır. Banklar dollar almadığı halda isə manata malik olan digər qurum MB-dir. Belə olan halda isə güman olunur ki, baş bank növbəti hərraclarda artıq xarici valyuta satışını deyil, dollar alışını həyata keçirəcək. Bu isə manat-dollar məzənnəsinin yenidən stabilləşməsinə gətirib çıxara bilər. Çünki bu halda dollara yenidən tələb formalaşacaq. Əgər MB hərraclara mütəmadi alıcı qismində çıxarsa, bu, manatın məzənnəsindəki möhkəmlənmələrin dayanmasına səbəb olacaq. Hətta bu, yenidən dolların bahalaşmasına gətirib çıxara bilər. Bu, Mərkəzi Banka öz xarici valyuta ehtiyatlarını artırmaq və manat bazasını genişləndirmək imkanı verəcək. Manat bazasının artması isə yenidən bazarda dollara tələbin yüksəlməsi deməkdir".