Azərbaycanda Milli Musiqi Günü münasibətilə sentyabrın 18-də Ankaradakı Qazi Universitetinin Memar Kəmaləddin adına konsert sarayında “Müsəlman Şərqinin ilk operasının müəllifi, Azərbaycan-türk dünyası musiqisinin simvolu Üzeyir Hacıbəyli” adlı konfrans, təqdimat və konsert keçirilib.

Bu barədə Kult.az-a Azərbaycanın Türkiyədəki Səfirliyinin Azərbaycan Mədəniyyət Mərkəzindən məlumat verilib.

Azərbaycanın Mədəniyyət Nazirliyinin dəstəyi, Türkiyədəki Azərbaycan Mədəniyyət Mərkəzi, Qazi Universiteti, Ankara Musiqi və Gözəl sənətlər Universitetinin birgə təşkilatçılığı ilə keçirilən tədbirdə diplomatlar, dövlət və beynəlxalq təşkilatların nümayəndələri, elm xadimləri, Türkiyədə təhsil alan azərbaycanlı tələbələr iştirak ediblər.

Tədbir çərçivəsində keçirilən konsert proqramında Ankara Opera və Baletinin mütəxəssisi, fortepianoçu Nailə Əhmədova, Azərbaycanın əməkdar artisti İslam Manafov, opera sənətçiləri Ömər Türkmənoğlu, Əli Tuna Güney, Fidan Hüseynova Üzeyir Hacıbəylinin əsərlərindən parçalar səsləndiriblər.