Mədəniyyət və Turizm Nazirliyi müğənnilərin Rəşid Behbudov adına Dövlət Mahnı Teatrından çıxarılmaları ilə bağlı məsələyə aydınlıq gətirib.

Nazirliyin mətbuat xidmətinin rəhbəri Zöhrə Əliyeva Axar.az-a açıqlamasında bildirib ki, bu tədbirlər Teatrın işinin gücləndirilməsi məqsədilə aparılır:

"2009-2019-cu illər üçün Dövlət Proqramında estrada musiqisinin inkişaf etdirilməsi məqsədilə bu sahədə islahatların aparılması nəzərdə tutulub. Sənəddə Estrada ansablının yaradılması da yer alıb. Mahnı Teatrındakı işdən azad edilmələr də bu islahatlarla bağlıdır. Proqrama və Prezidentin bununla bağlı sərəncamına uyğun olaraq tədbirlər görüləcək".

Z.Əliyevanın sözlərinə görə, bir müddət əvvəl ləğv edilən Muğam Teatrı və Mahnı Teatrının bazasında 2 yeni estrada ansambılı yaradılacaq. Həmin teatrlarda çalışan müğənnilər, eləcə də yeni simalar həmin ansambllarda yer alacaqlar.

Xatırladaq ki, Rəşid Behbudovun qızı Rəşidə Rəşid atasının adını daşıyan Mahnı Teatrından çıxarıldığı barədə açıqlama verib və bunu ailəsinə qarşı diqqətsizlik kimi dəyərləndirib. Atasının vəfatının ildönümü ilə bağlı anım tədbirlərinin keçirilməməsindən gileylənib.

Məsələyə aydınlıq gətirən Z.Əliyeva 2015-ci ildə Rəşid Behbudovun 100 illik yubileyinin keçirilməsinə hazırlıq görüldüyünü bildirib.

Onu da deyək ki, bu gün dünya şöhrətli müğənninin vəfatının 25-ci ildönümüdür.