Azərbaycan Respublikasının Prezidenti yanında Gənclər Fondunun qrant dəstəyi hesabına Elmar Məmmədovun rejissorluğu ilə çəkilən "Mənim hekayəm" bədii filminin ssenaristi Şəfaqət Cavanşirli (Mirzəyeva) hüquqlarının pozulmasından şikayətçidir.

Ssenarist Axar.az-a rejissor Elmar Məmmədovun onu və Gənclər Fondunu aldatdığını bildirib.

Elmar Məmmədovla rəfiqəsinin vasitəsilə ilə tanış olduğunu deyən ssenarist xanım rejissorun qadın zorakılığı ilə bağlı ondan ssenari yazmağını xahiş etdiyini deyib:

"Avqust ayında rəfiqəm Elmar Məmmədovla bizə qonaq gəldi. Elmarla onda tanış oldum. Ssenarini yazıb ona verdim. Bizə gəldi və dedi ki, ssenari ürəyincədir. Lakin filmi öz cibindən çəkdiyi üçün mənə pul verə bilməyəcəyini, bankdan pul götürüb çəkəcəyini vurğuladı. Dedim, madam sənət üçün, kino üçün borc altına girirsən, mən pul götürmürəm səndən. Amma filmin hansısa müsabiqədə qalib olsa və ya harasa təqdim eləsən, pul düşsə, mənə düşən qonorarı verəcəksən. Mən heç kimə pulsuz ssenari yazmıram".

Film çəkiləndən bir müddət sonra Feysbukda filmin əslində Gənclər Fondunun maliyyə dəstəyi ilə çəkildiyini bilən Şəfaqət xanım bu barədə rejissora yazaraq narazılığını bildirib:

"Elmar Məmmədova mesaj yazdım. Mənə cavab yazdı ki, bəs səni tanıyanda filmin pulunu çoxdan alıb yemişdim. Gənclər Fondunun sədri Fərhad Hacıyevə məktub yazdım. Onların da, mənim də Elmar Məmmədovla həyat yoldaşı Bəyanə Səttarova tərəfindən aldadıldığımızı məktubumda bildirdim".

Gənclər Fondunun məsələyə həddindən artıq soyuq münasibət bəslədiyini bildirən ssenarist Fondun bu məsələni düzgün araşdırmadığını deyib:

"Fərhad Hacıyevin və Gənclər Fondunun e-mail adreslərinə yazdığım məktublar cavabsız qaldı. Məktubu yenidən rəsmi şəkildə Gənclər Fonduna göndərdim. Nəhayət e-mail adresimə Gənclər Fondundan Faiq Qürbətov adlı şəxsdən cavab məktubu gəldi. Lakin onların cavabı məni qane etmədiyi üçün Gənclər Fonduna ikinci məktubumu və əlaqə nömrələrimi göndərdim. Gənclər Fondunda çalışan Mübariz Qədirov adlı şəxsdən nömrəmə zəng gəldi ki, bu, bizlik deyil. Sizin müqaviləniz olmalıdır. Dedim, müqavilə hər zaman maliyyə dəstəyi olan şirkətlə olur. Bir sözlə sübutlarıma baxmaq istəmədilər və onlara heç bir aidiyyəti olmadığını bildirdilər. Sonra Gənclər Fondu məni də, Elmar Məmmədovu da öz ofisinə çağırdı. Mən Elmar Məmmədovun onları da, məni də aldatmasıyla bağlı sübutları qarşılarına qoyanda, mənə Bəyanə Səttarovanın filmi artıq təhvil verdiyini və Elmar Məmmədovun onlara təhvil verdiyi sənəddə heç bir problem olmadığını dedilər. Mən isə onlara Gənclər Fondu filmi hələ təhvil almamışdan əvvəl şikayət etmişdim, lakin başısoyuqluq elədilər. Filmi araşdırmadan təhvil aldılar, Bəyanə Səttarovanın hazırladığı sənədi isə sübut kimi qarşıma qoydular. Lakin təqdim edilən sənədlərdə rejissordan tutmuş bütün heyət işçilərinin adları olmalı idi. Gənclər Fondu bunu araşdırmadı".

Şəfaqət xanım Elmar Məmmədovun artıq Gənclər Fondundan başqa bir layihə də aldığını qeyd edib: "Hal-hazırda Elmar Məmmədovun Feysbuk səhifəsinin örtük şəklində başqa bir işlə bağlı Gənclər Fondunun loqosu var.

Necə olur Gənclər Fondundan mənə deyirlər ki, sənədlərdə Elmar Məmmədovun da, sizin də ad yoxdur, amma saytlarında adımız qeyd olunub. Deyirəm, layihənin rəhbərini çağırın. Bəyanə Səttarovanı çağıra bilməyəcəklərini deyirlər: "Çağırsaq, sonra bizdən şikayət edə bilər". Gənclər Fondu nə üçün aldadılmasına göz yumur, nə üçün Bəyanə Səttarovadan aldığı sənədi araşdırmayıb, bu mənə də məlum deyil. Halbuki onların nizamnaməsində yazılıb ki, hər şeyi araşdırmalıdırlar. Hal-hazırda Elmar Məmmədov həmin yazdığım ssenarinin əsasında serial çəkmək istəyir. Başa düşmürəm, mənim icazəm olmadan necə serial çəkə bilər. Ssenari mənə məxsusdur. Elmar Məmmədov fırıldaqçıdır. Dövlətin gənclər üçün yaratdığı şəraitdən sui-istifadə edir".

"Mənim hekayəm" filminin rejissoru Elmar Məmmədov isə məsələ ilə bağlı Axar.az-a bunları bildirdi:

"Düzünü desək, mən adını belə çəkmək istəmədiyim adını ssenarist qoyan qızı tanımırdım. Mənim layihəmdə ssenaristə pul ayrılmadığına görə filmə ssenari axtaranda onun rəfiqəsi mənə pulsuz ssenari yazacaq birini tanıdığını söylədi. Bu məsələ ilə bağlı onların öz aralarında şifahi razılıq olub. Filmin çəkilməsi ilə bağlı Gənclər Fonduna müraciət etdim. Film ərsəyə gələndən sonra ssenarist mənə dedi ki, pul verməlisən. Sonra mənə irad bildirdi ki, niyə ondan xəbərsiz fonda layihə vermişəm. Bildirdi ki, əgər filmi fond maliyyələşdiribsə, onda mənə də pul düşməlidir. 700 manat istədi. Axı mən onunla pul söhbəti etməmişəm. Fond bu filmin çəkilməsi üçün 3500 manat pul ayırıb. Filmin Bakıda çəkilməsi nəzərdə tutulsa da, yaxşı alınması üçün biz onu Lənkəranda çəkdik. Çəkiliş zamanı hətta cibimdən belə pul xərclədim. Hətta Gənclər Fondu ilk olaraq pulun 70%-ni ödədikdən sonra bankdan 1500 manat pul götürdüm ki, film daha da uğurlu alınsın. Fondla aramda bağlanan müqavilədə ssenaristə pulun verilməsi göstərilməyib. İndi ssenaristin məndən pul istəməsi heç bir hüquq çərçivəsinə sığmır. Ssenarist mənim yeni seriala başladığımı öyrəndikdən sonra elə düşünür ki, onun ssenarisi əsasında serial çəkiləcək. Bildirmək istəyirəm ki, o, ümumiyyətlə ssenarist deyil. Əlavə olaraq büdcə formasını da sizə göndərirəm".

Xatırladaq ki, rejissor Elmar Məmmədov 2014-cü ildə Azərbaycan Respublikasının Prezidenti yanında Gənclər Fondunun maliyyə dəstəyi ilə "Mənim hekayəm" adlı bədii film çəkib. Eyniadlı ssenari əsasında Gənclər Fondundan alınan layihənin rəhbəri Elmar Məmmədovun həyat yoldaşı Bəyanə Səttarovadır.