ABŞ Prezidenti Donald Trampın Rusiya lideri Vladimir Putinə atəşkəslə razılaşmaq üçün verdiyi 50 gün müddət ərzində Ukrayna Rusiyaya qarşı müqavimətdə ümumi vəziyyəti dəyişmək üçün kifayət qədər güc və vəsait toplaya biləcək.

Axar.az xəbər verir ki, bu fikirləri Ukraynanın keçmiş xarici işlər naziri Vladimir Oqrızko deyib.

“Bu 50 gündən gözləntim odur ki, Ukrayna kifayət qədər vasitə və qüvvə toplaya biləcək ki, Rusiya başa düşsün – paytaxtları bombalamağı bacaran təkcə o deyil. Mənim yeganə gözləntim budur və görünür, bu, ümumi vəziyyətdə çox ciddi rol oynaya bilər. Üstəlik, "ölü" rus iqtisadiyyatının boğazındakı ilmə sıxılmaqda davam edir”, – deyə Oqrızko vurğulayıb.

O, həmçinin xatırladıb ki, Ukraynanın müttəfiqləri Rusiyaya qarşı yeni sanksiya paketləri hazırlayırlar və bu təzyiq prosesi Rusiya iqtisadiyyatını tam “boğmasa” da, onun sakit və sərbəst inkişaf etməsinə imkan verməyəcək, Moskvanın imkanlarını daim ləngidəcək.

Qeyd edək ki, Tramp Rusiyanı sanksiyalarla hədələyib və 50 gün vaxt verib.