Uşaqlarda insult – beyin qansızması böyüklərə nisbətən az rast gəlinsə də, bu hal anadangəlmə ürək qüsurları, damar xəstəlikləri və ya anomaliyaları, qan laxtalanması pozğunluqları, bəzən isə baş və ya boyun zədələnmələri, yaxud infeksiyalar nəticəsində baş verə bilər.

Axar.az Medicina.az-a istinadən xəbər verir ki, Ümumdünya İnsultla Mübarizə Günündə Rusiya Uşaq Klinik Xəstəxanasının neyrocərrahiyyə şöbəsinin nevroloqu İrina Rasskazçikova uşaqlarda bu təhlükəli vəziyyəti necə müəyyən etmək lazım olduğunu izah edib:

“Əsas xəbərdaredici əlamət nevroloji pozuntuların qəfil meydana çıxmasıdır. Məsələn, uşağın hərəkətləri və ya danışığı dəyişə, tarazlığı pozula, görmə problemləri yarana və ya uşaq qeyri-adi dərəcədə yuxulu ola bilər.

Əgər qol və ya ayaqda – xüsusilə bədənin bir tərəfində – zəiflik və ya keyimə, üzün qəfil asimmetriyası (məsələn, təbəssümün əyri olması), danışmaqda və ya danışılanı anlamaqda çətinlik, tarazlıq və ya koordinasiyanın kəskin pozulması, yeriməkdə çətinlik, qəfil ikiqat görmə və ya görmə itkisi, qeyri-adi dərəcədə şiddətli baş ağrısı (xüsusilə qusma ilə müşayiət olunarsa), qıcolma (xüsusən də uşaqda ilk dəfə baş verirsə), yaxud qəfil və dərin yuxululuq, şüurun qarışması və ya itirilməsi kimi əlamətlər müşahidə edirsinizsə, dərhal narahat olmalı və tədbir görməlisiniz".

Körpələrdə və azyaşlı uşaqlarda beyin qan dövranının pozulması əlamətləri çox vaxt nəzərə çarpmaya bilər. Bəzən ilk əlamət qıcolma ola bilər, bədənin bir tərəfindəki zəiflik isə dərhal hiss olunmaya bilər.

İnsult şübhəsi olduqda, uşaq xəstəxana şəraitində təcili tibbi müayinədən keçməlidir. Həkim qeyd edib ki, işemik insult zamanı bəzi xəstələrə qan laxtasını əridən dərmanlar verilə bilər və ya damardakı laxtanı çıxarmaq üçün endovaskulyar (damardaxili) müdaxilə həyata keçirilə bilər.