AMEA-nın akademik H.Əliyev adına Coğrafiya İnstitutunun elmi seminarında paleocoğrafiya şöbəsinin aparıcı elmi işçisi, geologiya-mineralogiya üzrə fəlsəfə doktoru Rəşid Fətəliyev “Meteoritlər, Cənubi Xəzər hövzəsi və Azərbaycan folkloru” mövzusunda təqdimatla çıxış edib.

İnstitutdan Kult.az-a bildirilib ki, təqdimatda meteoritlər, onların Günəş sistemində mövqeyi, Yerə düşməsinin səbəbləri, meteorit kraterləri və astroblemlər, meteoritin növləri, Azərbaycan ərazisinə düşmüş meteoritlər, eləcə də yalançı meteoritlər haqqında məlumat verilib.

Müəllif Cənubi Xəzər çökəkliyinin yaranmasına dair mövcud konsepsiyalardan fərqli bir fərziyyə irəli sürərək onun meteorit mənşəli, yəni astroblem olması fikrini ortaya qoyur. Qeyd edilir ki, Cənubi Xəzər çökəkliyinin müasir vəziyyəti Neogen dövründə, daha doğrusu, Pont və Alt Pliosen əsrləri arasında nəhəng bir asteroidin Cənubi Xəzər ərazisinə düşməsi və sonrakı 5 milyon il ərzində baş vermiş tektonik və geomorfoloji proseslər nəticəsində formalaşıb. Bununla belə, fərziyyənin təsdiqi üçün ciddi tədqiqat işlərinin aparılmasına ehtiyac var.

Tədqiqatçı, həmçinin meteoritlər və Azərbaycan folklorunun bəzi janrları arasında mümkün əlaqənin olmasına dair araşdırmalar aparıb və bu istiqamətdə maraqlı nəticələr əldə edib.