Gənc rəssam Məryəm Ələkbərlinin yaradıcılığı artıq Azərbaycanda və postsovet məkanında deyil, Fransa, Almaniya, İtaliya və Türkiyə kimi ölkələrdə də geniş şöhrət qazanıb. Onun Paris, Dovil, Roma, Riqa, İstanbul və Berlində, həmçinin digər şəhərlərdə nümayiş etdirilən əsərləri sənətsevərlərin böyük marağına səbəb olub.

AzərTAc xəbər verir ki, Məryəm Ələkbərlinin tabloları çox nüfuzlu yeni bir sərgidə nümayiş olunacaq.

2015-ci il iyunun 12-dən etibarən Parisdə Luvr muzeyinin Karusel sərgi salonunda keçiriləcək "Art-shopping" festivalının ekspozisiyasına Məryəm Ələkbərlinin əsərləri də daxil edilib. İldə iki dəfə keçirilən bu tədbir müasir dünya incəsənətində yeni simaların və estetik cərəyanların aşkar olunmasına xidmət göstərir. Sərgidə Məryəm Ələkbərlinin müxtəlif janrlarda 20-dən artıq əsəri nümayiş olunacaq. Artıq rəssamın 4 işi "Art-shopping"in saytında yerləşdirilib.