Bu gün paytaxtın Nizami rayonunda yerləşən 312 nömrəli tam orta məktəbdə Beynəlxalq Ana dili gününə həsr olunmuş tədbir keçirilib.

Kult.az xəbər verir ki, məktəbin Azərbaycan dili və ədəbiyyatı müəllimi Elmira Cəbiyevanın təşkilatçılığı ilə keçirilən tədbirdə valideynlər, müəllimlər və media nümayəndələri iştirak edib.

Azərbaycan Respublikasının dövlət himni ilə start verən tədbirdə məktəbin istedadlı şagirdləri Səməd Vurğunun “Vaqif“ dramından, Cəlil Məmmədquluzadənın “Anamın kitabı” tragikomediyasından, “Azərbaycan” məqaləsindən, Dədə Qorqud dastanından, İlyas Əfəndiyevin “Xurşidbanu Natəvan” pyesindən hazırlanmış səhnələri canlandırıblar.

Bir-birini əvəzləyən möhtəşəm kompozisiyalar, bədii qiraət nümunələri, səhnəciklər və rəqslərlə yanaşı, xüsusi hazırlanmış “Varvarizimlərə son“ sosial çarxı ilə nitqimizdə, ana dilimizdə qarşılığı olduğu halda yerli-yersiz əcnəbi sözlərin işlədilməsinin yolverilməz olduğu bir daha vurğulanıb.

Tədbirdə çıxış edən təşkilatçı Elmira Cəbiyeva bildirib ki, ana dilimizi şagirdlərə sevdirmək üçün məktəbdə bu cür tədbirlərin keçirilməsinə xüsusi diqqət ayrılır.

Daha sonra məktəbin direktoru Xatirə Hacıyeva çıxış edərək, məktəbdə müxtəlif tarixi hadısələrin, əlamətdar günlərin, milli bayramların qeyd edilməsi ənənəsindən danışıb.