"Bir həftə Bakıda oluram, bir həftə Qarabağda. Ancaq bizim orda oturmağa yerimiz belə yoxdu".

Azərbaycan Yazıçılar Birliyinin Qarabağ bölməsinin sədri Ənvər Əhməd bölmənin vəziyyəti haqda Axar.az-a danışıb:

"Yazarları toplayıram başıma – "Muğam Mərkəzi"ndə görüşlərimizi keçiririk. Təqdimatlar, gənclərin kitablarına ön söz yazıram. Ağcabədidə, Beyləqanda, Ağdamda belə görüşlərimiz olur. Daha çox qaçqınlar harda toplanır, orada keçiririk görüşləri.

Mən lap gedib Ağdamda, Ağcabədidə də oturaram, amma orda maaş yoxdur. Mən əlimdən gələni edirəm. Bəzi bölgələrə maaş verirlər. Məsələn, Gəncə, Qazax, Lənkəran və s. alır, amma biz almırıq. "Niyə"si də məlum deyil. Mənim bu haqda televiziyalardakı çıxışlarımı yığsan, bir maşın götürməz. Bizim qeydimizə qalmalıdırlar, biz məhv olan torpağın ədəbiyyatını, mədəniyyətini yaradırıq – çox iş görürük. Bu saat ədəbiyyat böyük bir ordudur. Bizim uşaqlar yüksək səviyyədə ədəbiyyatla məşğul olurlar. Amma maddi vəsait ayırmırlar ki, bunların bir almanaxını buraxasan, kitabını çıxarasan və s. Mən özüm də maaşsız işləyirəm. Nə eləyirəmsə, öz gücümə eləyirəm".

Məsələ ilə bağlı AYB rəhbərliyinin mövqeyini də işıqlandırmağa çalışacağıq.