Məşhur geyim markası "Şanel"in alman əsilli baş dizayneri Karl Laqerfeld bu dəfə Birman cinsi pişiyi Şoupetin illik qazancı ilə gündəmə gəlib.

Axar.az xəbər verir ki, XX əsrin ən önəmli moda təmsilçilərindən biri Karl Laqerfeldin reklamlara çəkilən pişiyi Şoupetin illik qazancının 3 milyon avro olduğu bildirilib.

Karl Laqerfeld pişiyinin illik qazancını ABŞ-da yayımlanan "Nyu York Maqazin" jurnalına verdiyi müsahibədə açıqlayıb. Dişi pişiyinin ona ilham verdiyini vurğulayan məşhur dizayner Şoupet Laqerfeld adlı pişiyinin illik qazancından çox məmnun olduğunu dilə gətirib. Pişik keçən il kosmetik marka "Şu Uemura"da şəxsi kolleksiyasına sahib olub və ingilis avtomobil markası "Vokşul"un reklamı üçün kamera qarşısına keçib.

Laqerfeld belə açıqlama verib: "Normal pişik yeməklərini yeməyinə və başqa pişiklər kimi oynamağına icazə vermirəm. Şoupet bunları eləmək üçün çox intellektual pişikdir".

Qeyd edək ki, pişiyin iki baxıcısı və minlərlə izləyicisi olan İnstaqram hesabı var.