Bəzi telekanalların mətbuat xidmətləri və ya bu işə məsul bir şəxs olmadığına görə jurnalistlərin sualları cavabsız qalır. Məsələ ilə bağlı MTRŞ-nın aparat rəhbəri Toğrul Məmmədov və teletənqidçi Qulu Məhərrəmlinin fikirlərini öyrəndik.

MTRŞ-nın aparat rəhbəri Toğrul Məmmədov televiziyaların daxili işlərinə qarışmadıqlarını deyir:

"Ola bilsin ki, bəzi telekanallarda "mətbuat xidməti"nin funksiyalarını başqa bir department yerinə yetirir. Biz televiziyaların daxili işlərinə qarışmırıq. Onlar mətbuat xidmətini yarada da bilərlər, yaratmaya da, öz işləridir".

Jurnalist, teletənqidçi Qulu Məhərrəmli isə bu fikirdədir ki, özünə hörmət edən kanal belə bir strukturu yaratmalıdır:

"Televiziya kanallarının, ümumiyyətlə, bütün qurumların ictimaiyyətlə əlaqələr bölməsi, mətbuat xidməti olmalıdır. Əgər bunu yaratmaq üçün maddi vəsait yoxdursa, mütləq məsul bir şəxs seçilməlidir ki, mətbuatla əlaqədar məlumatları yaysın, suallara cavab versin və s.. Mənim düşüncəmə görə, bu belə olmalıdır. Kütləvi İnformasiya Vasitələrində bunun olması vacibdir. Amma bu, qurumların daxili işləridir. MTRŞ heç kimə göstəriş verə bilməz ki, bunu yarat, ya yaratma. Özünə hörmət edən qurum belə bir strukturu yaradır. Bu, normal, sivil bir qaydadır".