Sentyabrın 16-18-i tarixlərində keçiriləcək IV Bakı beynəlxalq kitab sərgi-yarmarkasında "Hədəf" nəşrləri və XAN nəşriyyatı iki stendlə iştirak edəcək.

Axar.az xəbər verir ki, sərgi müddətində oxucular hər iki nəşriyyatın kitabını 20-25 faizlik endirimlə əldə edə biləcək. "Hədəf" nəşrləri sərgiyə 100 metodik vəsait, 60 uşaq kitabı, XAN nəşriyyatı isə 150 bədii kitabla qatılacaq.

Yarmarka müddətində – sentyabrın 17-i saat 17:00-da filologiya üzrə fəlsəfə doktoru, yazıçı Şəmil Sadiqin yeni çap edilmiş "Arvadsız kişi" hekayələr kitabının imza və təqdimat mərasimi keçiriləcək. Tədbirdə hər hansı bir gənc yazarın kitabını alan oxucuya "Arvadsız kişi" hekayələr kitabı pulsuz hədiyyə olunacaq.

Həmin gün "Hədəf" nəşrlərinin Mədəniyyət və Turizm Nazirliyi ilə ortaq layihəsi olan "Yazıçılarımızı dünyaya tanıdaq" kitab dəsti oxuculara təqdim ediləcək. Sentyabrın 18-i saat 14:00-da isə detektiv yazıçı Müşfiq Xanın imza mərasimi keçiriləcək.

Sərginin rəsmi bağlanış mərasimi sentyabrın 18-i saat 16:00-da baş tutacaq.