Bakıda yerləşən Fransız İnstitutunda Pulitser mükafatlı yazar, jurnalist Klod Salhaninin ABŞ-da çapdan çıxan sonuncu "Andiçmə günü" (Inauguration Day) kitabının təqdimatı keçiriləcək.

Axar.az xəbər verir ki, Klod Salhaninin eyni zamanda jurnalist karyerasından da bəhs edəcəyi görüş yanvarın 13-də baş tutacaq.

İllərdir işlədiyi Azərbaycanı bu yaxınlarda birdəfəlik tərk edəcək jurnalist özünün buradakı təcrübəsini, xarici müxbir olaraq bu ölkəyə baxışını paylaşacaq. Görüş Fransız İnstitutunun giriş zalında kiçik kokteyl ilə davam edəcək. İştirak və girişin sərbəst olacağı görüş Azərbaycan dilinə tərcümə ilə müşayiət olunacaq.

Xatırladaq ki, Pulitser mükafatlı jurnalist hazırda Bakıda Trend Xəbər Agentliyində baş redaktor, "Thearabweekly.com" saytı üçün siyasi analitik olaraq çalışır və "Haffinqton Post" səhifələrində yazıları çap olunur. Jurnalist, politoloq, TV və radio şərhçisi, Ərəb-İsrail, Yaxın Şərq, Mərkəzi Asiya məsələləri üzrə mütəxəssis, terrorizm və siyasi islam üzrə ekspert Klod Salhani CNN, FOX, BBC, VOA, "Al-Hurra", "Frans 24" və "Russia Tudey" kimi televiziya kanallarında çıxış edib, məqalələri "Nyu York Tayms", "Middl East Tayms", "Vaşinqton Post", "Vaşinqton Tayms", "İnternaşonal Herald Tribun", "Tayms" və başqa mətbu orqanlarda çap olunub. "Andiçmə günü" (Inauguration Day) Klod Salhaninin beşinci əsəridir. Siyasi intriqa fonunda Mərkəzi Kəşfiyyat İdarəsinin gənc bir agenti Laura Atvudun jurnalist Kris Kleybornla birlikdə Amerika Birləşmiş Ştatlarının prezidentini təhdid edən terror hücumunun qarşısını almağa çalışdığından bəhs edən trillerdir.