Fransız satirik jurnalı "Şarli Hebdo" ("Charlie Hebdo") yenə tənqid hədəfi olub.

Axar.az xəbər verir ki, jurnalın çəkdiyi Aylan Kürdi karikaturasında uşağın böyüyəndə Almaniyadakı təcavüzkarlardan biri ola biləcəyinə eyham vurulub.

"İmmiqrantlar" başlıqlı karikaturada Aylanın sahilə çıxan cəsədi bir şar içində görünür, yanında isə "Balaca Aylan böyüyəndə kim olardı" sualı yazılıb.

Bu sualdan aşağıda qaçan bir qadın, əlləri açıq şəkildə qovan iki kişi görünür. Karikaturanın altında fransızca "Tripoteur" sözü yazılıb. Bu ifadə "arxadan əllə təcavüz etmək" anlamına gəlir.

Jurnalın bu karikaturası Almaniyanın Köln şəhərində Yeni ili qeyd edən 100-ə yaxın almaniyalı qadının suriyalı immiqrantlar tərəfindən təcavüzə uğramasından sonra çəkilib.